Ձեր վստահելի աղբյուրը

«Իսկապես, հուզիչ պահ է. ճիշտ 33 տարի առաջ նույն այսպիսի եղանակային պայմաններում տեղի ունեցավ առաջին հանրահավաքը, և սկսվեց Ղարաբաղյան շարժումը»,- այսօր Նիկոլ Փաշինյանի հրաժարականի պահանջով մեծ հանրահավաքի ընթացքում ասաց «Հայրենիքի փրկության շարժման»  վարչապետի միասնական թեկնածու Վազգեն Մանուկյանը։

Նրա խոսքով, ցեղասպանությունից հետո միակ կղզին, որ բնակեցված էր բնիկ հայերով, դիմեց Հայաստանին և ասաց, որ ուզում է միավորվել Հայաստանի հետ. դա Արցախն էր։

«Ինքը դիմեց՝ մայր Հայաստան, ուզում եմ քեզ հետ լինել, ու մեր ամբողջ ժողովուրդը ոտքի կանգնեց։ Դրանից հետո երկար ճանապարհ անցանք։ Շարժման հենց ամենասկզբից դրվեցին նաև ուրիշ խնդիրներ, մենք մեզ շատ հզոր էինք զգում, մենք մեր առջև ավելի մեծ խնդիրներ դրեցինք»,- ասաց նա։

Ապա շարունակելով խոսքը՝ Վազգեն Մանուկյանն ասաց, որ Ղարաբաղյան շարժման ընթացքում դրվել էր խնդիր՝ ստեղծել անկախ պետություն, որը հիմնված կլինի ազգային և ազատության գաղափարների վրա, պետությունում լինի արդարություն և բարգավաճում ամբողջ ժողովրդի համար, այլ ոչ՝ մի խումբ մարդկանց համար։

«Եվ մենք գնացինք առաջ։ Ո՞րն էր ձևը մեր պայքարի. մենք Խորհրդային միությունում առաջին անգամ հայտարարեցինք համազգային գործադուլ, ամեն օր տեղի էին ունենում հանրահավաքներ, պարալիզացվում էր քաղաքը, ցույցեր էին լինում, բանակցություններ..., եղան և շենքերի գրավումներ։ Եվ Հայաստանում ձևավորվեց երկիշխանություն։ Այդ ճանապարհը բերեց մեզ արդյունքի։ Մենք իսկապես կարողացանք ազատագրել Արցախը, կարճ ժամանակում ստեղծեցինք մարտունակ բանակ, պարտադրված պատերազմը հաղթեցինք, ունեցանք անկախ պետություն, որտեղ կային և՛ ազատության, և՛ ազգայինի սաղմեր, բայց մեզ բավարար չէր։ Եվ պատահական չէր, որ կիսվեց Ղարաբաղ կոմիտեն...։ Եվ պատահական չէ, որ 1996 թվականին պայքարի մեջ հանդիպեցին Ղարաբաղ կոմիտեի երկու անդամներ»,- ներկայացրեց Վազգեն Մանուկյանը։

Իսկ ահա 2018-ին, նրա խոսքով, առաջացավ մարդկանց մի խումբ, որ ասաց, թե արդար պետություն կկառուցի, որտեղ կլինի հավասարություն, չի լինի կոռուպցիա։ Այդ իսկ պատճառով, ըստ Վազգեն Մանուկյանի, ժողովրդի մի մեծ հատված մտածեց, թե դա հենց այն է, ինչի համար ինքը պայքարում էր։

«Ո՛չ։ Իրենք մեզ չխաբեցին, մենք խաբվեցինք։ Որովհետև եթե դուք կարդայիք, թե այդ մարդիկ ինչ էին գրում ու ինչ էին ասում նախորդ տարիներին, դուք երբեք այդ ճանապարհով չէիք գնա։ Եվ երեք տարի անց մենք ի՞նչ ունենք. ողբերգություն։ Մենք կորցրինք ամեն ինչ։ Մեր ռազմական բոլոր հաղթանակները ոչնչացան, պետությունն անկախ չէ, մեր անվտանգությունն ապահովում է Ռուսաստանը, այսինքն՝ մենք դառնում ենք այդ իմաստով լրիվ կախյալ։ Նրանք մտածում են, որ գնան, Ռուսաստանում քծնեն Պուտինին, և տակից էլ իրենց գործն անեն, դա գործընկերություն է։ Փչացրեց ամեն ինչ։ Իրենք փորձեցին ազգաինը վերացնել։

Ազատության մասի՞ն  ենք խոսում, ի՞նչ ազատություն. սա դառնում է ոստիկանական պետություն, ձերբակալում են ամենաազնիվ, երկրին նվիրված մարդկանց։ Մենք այդպիսի՞ պետությունում էինք ուզում ապրել»,- հարց հնչեցրեց նա։

Ըստ Վազգեն Մանուկյանի, տնտեսությունը ևս ողբալի վիճակում է, կոռուպցիան չի վերացել։

«Ինձ ասում են, որ Նիկոլ Փաշինյանը հազարավոր դոլարներ է տվել իր թիմակիցներին, որ դուրս չգան «Իմ քայլը» խմբակցությունից։ Կստուգենք՝ ճիշտ է, թե ոչ։ Եվ հարց է առաջանում՝ կարո՞ղ ենք մենք այս վիճակից դուրս գալ»,- նշեց Վազգեն Մանուկյանը։

Նրա այդ խոսքին հետևեց քաղաքացիների պատասխանը. «Այո՛, միասնական»։

Արձագանքելով՝ վարչապետի միասնական թեկնածուն ասաց. «Ժողովո՛ւրդ ջան, ինչ լավն եք։ Իսկապես կարող ենք, մենք ուժեղ ենք և կարող ենք այս վիճակից դուրս գալ»։

Վազգեն Մանուկյանը նկատեց՝ այս վիճակից դուրս գալու համար կա նախապայման՝ այս վարչակազմը պետք է դուրս շպրտվի։

«Դրանից հետո կսկսվեն այն իրական քայլերը, որ պետք է կատարվեն։ Իսկ ի՞նչ քայլեր. մենք ոչ միայն պետք է վերականգնենք այն ամենը, ինչ կորցրել ենք, այլ մենք դրա վրա պետք է կառուցենք այն պետությունը, որի մասին երազում էինք։ Եթե Նիկոլ Փաշինյանը գնա, բայց նորից գան մարդիկ, որոնց համար իշխանության տենչը, փողը, ընտրական կեղծիքը մնա, ուրեմն մենք ոչ մի նպատակի չհասանք։ Նորից մի հատ Նիկոլ առաջ կգա։ Մեր պայքարում պետք է լինի և՛ մերժումը ներկայի, և՛ սաղմերը ապագայի...։ Դժվար է լինելու, պետք է արագորեն վերակառուցել մեր բանակը, մեր անվտանգությունը պետք է ապահովեն ոչ թե ռուսական, այլ՝ հայկական զորքերը»,- ասաց Վազգեն Մանուկյանը։

Իսկ թե ինչպես պետք է ազատվել այս վարչակազմից, Վազգեն Մանուկյանը երկու՝ պլան «Ա» և պլան «Բ» ներկայացրեց։

«Առաջինն այն է, որ ինչ ցույցեր էլ մենք անենք, Նիկոլ Փաշինյանն ինքնակամ չի թողնելու իշխանությունը։ Ես նախանձով եմ նայում վրաց ժողովրդին, թե ինչ պարկեշտ վարչապետ ունեին, որ փոքր դեպքի համար հրաժարական տվեց։

Ուրեմն պետք է ջարդել այն հենարանները, որ ինքը ունի։ Որո՞նք են այդ հենարանները. առաջին հենարանը մեր հայրենակիցների այն հատվածն է, որ չի գիտակցում, թե այս պետությունն ինչ ճանապարհով է գնում։ Մեր պարտքն է մեր հայրենակիցներին բացատրել, թե ինչ է կատարվում այս երկում։ Երկրորդ հենարանն ուժային կառույցներն են՝ ոստիկանություն, ԱԱԾ։ Նրանք չեն գիտակցում, որ ծառայում են թուրք-ադրբեջանական ծրագրին։ Պետք է լինել կոշտ ու համոզիչ։ Բացի այդ, պետք է ԱԺ այն պատգամավորներին նահանջի տեղ թողնենք, որոնք կողմ են Նիկոլ Փաշինյանին։ Հայաստանը պետք է եռա»,- նկատեց նա։

Ինչ վերաբերում է պլան «Բ»-ին, ապա Վազգեն Մանուկյանն ասաց, որ պետք է ամեն վայրկյան պատրաստ լինել՝ ապստամբելով, կայծակնային արագությամբ իշխանությունը վերցնելուն։
«Մենք կգնանք առաջին ճանապարհով՝ պատրաստ լինելով երկրորդ ճանապարհին»,- ասաց նա։