Ձեր վստահելի աղբյուրը

«Իրականում այս հարուցված գործն իր մեջ ունի զրո տրամաբանություն, մեղմ ասած»,-դատարանի շենքի դիմաց լրագրողների հետ զրույցում հայտարարեց «Քառյակ Մեդիա»-ի համահիմնադիր Կարեն Բեքարյանը։

Հիշեցնենք, որ ԱԱԾ-ն փետրվարի 19-ին նրան ձերբակալել էր՝ ֆեյսբուքյան կեղծ օգտատեր Գագիկ Սողոմոնյանի գրառումների գործով։ Քիչ առաջ դատարանը չբավարարեց նրա նկատմամբ կալանքը որպես խափանման միջոց ընտրելու վերաբերյալ միջնորդությունը։

Դատարանի շենքից դուրս եկած Բեքարյանին ու փաստաբանին հավաքվածները դիմավորեցին բարձր ծափահարություններով։

«Երբ չես հասկանում գործի էությունը, ինչ է հետապնդվում, չես տեսնում, որ կա տրամաբանություն, պարզ հասկանում ես, որ մոտիվացիան այլ տեղ է»,- ասաց Բեքարյանը՝ նշելով, որ ամեն ինչ իր համար պարզ է։

Անդրադառնալով VPN հավելվածի օգտագործման մասին հարցին՝ Բեքարյանն ասաց, տարիների ընթացքում Ադրբեջանը հայաստանյան IP-ների համար սահմանափակումներ է օգտագործել, այսինքն` հայաստանյան IP-ների համար ադրբեջանական, այդ թվում պետական կայքերը փակ են եղել։

«Եթե դու ուզում ես գործընթացները պատկերացնես, իսկ ոչ մեկի համար գաղտնիք չէ, որ ես զբաxվում եմ արտաքին քաղաքական գործընթացների վերլուծությամբ, չես կարող այդ ինֆորմացիան չունենալ, չվերլուծել, վերլուծությունների մեջ չներառել»,- ասաց նա։

Բեքարյանը նշեց, որպեսզի արտասահմանում ապրող ընկերներին երկար չբացատրի, թե իրեն ինչ ինֆորմացիա է պետք, որտեղից, ինչ ծավալով, օգտվել է VPN-ից։

«Հիմա եթե գերիների վերաբերյալ ինֆորմացիան անընդհատ փոխվում է, մեր իրավաբաններն ինչպե՞ս դա կարող են ստանալ հետագայում դրանք օգտագործելու համար»,- ասաց նա՝ ընդգծելով, որ նույն VPN համակարգից օգտվելու մանրամասներին ծանոթանալու համար կարելի էր դիմել մասնագետներին կամ ուղղակի պետք էր ունենալ պարզագույն գիտելիքներ։

Բեքարյանն ասաց, շատ մանրամասներ ասել չի կարող՝ նախաքննական գաղտնիքը հաշվի առնելով։

Բեքարյանն իր դեմ հարուցված գործը որակում է քաղաքական հետապնդում։

«Ես ուզում եմ պարզագույն հարց տալ, երկու տարուց ավելi իմ ամենօրյա աշխատանքն է հասկանալի, ընկալելի, քաղաքակիրթ բառակազմով հասարակությանը տեղեկացնել, թե բանակցությունները որտեղից ուր են հասել, նման բառամթերքով գրառումներn ի՞նձ օգնում են, իմ ընկերների՞ն օգնում են, թե՞ ոչ։ Հարց եմ տալիս, նման բառամթերքով գրառումներն ո՞ւմ օգտին են աշխատում։ Եվ հաջորդ հարցը, ես այս տարիների ընթացքում գործիքի պակա՞ս եմ զգացել իմ մոտեցումներն ու կարծիքը հասարակությանը ներկայացնելու համար»,- ասաց նա՝ շնորհակալություն հայտնեց լրագրողներին ու հավաքվածներին, հեռացավ։