Ձեր վստահելի աղբյուրը

20։20
Անհնազանդության ակցիա իրականացնողները ամփոփեցին երթը։ Վարչապետի՝ ընդդիմության միասնական թեկնածու Վազգեն Մանուկյանն ասաց, որ այն, ինչ կատարվեց, սարսափելի էր, այն, ինչ մեզ սպասվում է այս իշխանությունների օրոք, ավելի սարսափելի է լինելու։«Սա քաղաքական պայքար չէ։ Մենք ուզում ենք փրկել հայ ազգը և այս պետությունը։ ՀՀ-ում սահմանադրությունը չի աշխատում իրենց պատճառով։ Ամեն օր իրենք խախտում են սահմանադրությունը»։

20։04
Հայրենիքի փրկության շարժման երթի մասնակիցները Ֆրանսիայի հրապարակում են։

19։58
«Երեք տարի առաջ ԱԺ դարպասները բացել էին, ասում էին ԱԺ-ն ժողովրդինն է, Հայաստանում փակ դարպասներ չեն լինելու։ Հիմա նայեք այս դարպասներին, վերջին 2-3 ամսվա մեջ կրկնակի ամրացրել են, սա է այս իշխանության դիմագիծը»,- ԱԺ շենքի դիմաց հայտարարեց դաշնակցական Իշխան Սաղաթելյանը և կոչ արեց պատգամավորներին դուրս գալ փողոց և միանալ պայքարին։

«Մեկ անգամ ևս կոչ ենք անում, խելքի եկեք և մի դարձեք այդ դավաճանի հենարանը»,- ասաց նա։

19։55
«Գործ է, հարուցել են, ինչ է եղել որ։ Առաջին անգամը չէ, որ իմ դեմ գործ են հարուցում»,- Հայրենիքի փրկության շարժման երթի ընթացքում ասաց ընդդիմության թեկնածու Վազգեն Մանուկյանը՝ պատասխանելով լրագրողի այն հարցին, որ իր հայտարարությունների մասով քրգործեր են հարուցվել։ Ինչ վերաբերում է Անդրանիկ Քոչարյանի հայտարարությանն, ապա, Մանուկյանն ասաց․
«Իշխանությունը պահելու համար մտածում է այդ քայլին գնալ, բայց չի կարողանա և չի համաձակվի»,-ասաց Մանուկյանն ու շարունակեց, որ ժողովուրդն է նրանց հետ պահողը։

19։43
Երթի մասնակիցները կանգ առան նախագահական նստավայրի մոտ ՝ Բաղրամյան 26 շենքի մոտ։
«Ցավոք սրտի արցախյան կորստից հետո մեր շատ հայրենակիցներ հասկացան, թե 2018 թվականին ում էին բերել իշխանության։ Բայց կարող էին նույն 2018 թվականին հասկանալ, որ իշխանության են բերել մեկին, որը միայն սիրում է նյութապաշտությունը, հարմարավետությունը։ Հիմա, կանգնած այստեղ դիմում ենք ՀՀ նախագահին, որը պաշտոնապես միացավ ժողովրդի շարժմանն ու վարչապետի հրաժարականի պահանջին, որ Արմեն Սարգսյանը պաշտոնական պահանջի տերը լինի։ Դրա համար ունի 2 գործողություն՝ չվավերացնի որևէ փաստաթուղթ, որն ուղարկվում է նախագահական պալատ վավերացման և երկրորդը ՝ պետք է դիմի գործողությունների ՝ քաղաքացիներին, օրենքը պաշտպանելու և կառավարության ու Նիկոլի հրաժարականը ժամ առաջ իրականություն դարձնելու համար»,- նախագահական շենքի դիմաց հայտարարեց Գեղամ Մանուկյանը։

19։34
«Առանց Նիկոլ Հայաստան» վանկարկումներով բողոքի երթի մասնակիցները շարժվում են առաջ։
«Այսօր էլ աներեսաբար, իրեն գժի տեղ դրած, կարծես ոչ մի բան չի եղել , կարծես Շուշին չի ընկել, կարծես Հադրութը չի ընկել, կարծես Արցախի 70 տոկոսը չի գրավվել, նստած թիթեռ են նկարում կառավարության շենքում»,-երթի ընթացքում ասաց դաշնակցական գործիչ Գեղամ Մանուկյանը։

Անդրադառնալով իրավապահ համակարգին, ասաց որ նրանք պաշտպանում են հողատուին․
«Երկու կոպեկ փող են տալիս, տուն եք պահում, արդարացում չի լինի, բավական է բռնեք այդ վարչապետական աթոռի ոտքերը, թողեք գնա, որ մենք ունենանք առանց Նիկոլ Հայաստան»։

19։20
Հայրենիքի փրկության շարժման երթը շարունակվում է։ Մասնակիցները Հ․ Քոչար փողոցով շարժվեցին դեպի Բաղրամյան պողոտա։ Երթի մասնակիցները կշարժվեն մինրև Ֆրանսիայի հրապարակ, որտեղ էլ սպասվում է անհնազանդության ակցիա:

Ակցիայի մասնակիցները վանկարկում են՝ «Նիկոլ դավաճան», «Առանց Նիկոլ Հայաստան»։

Նշենք, որ երթը մեկնարկել էր  Արաբկիր վարչական շրջանի Պրահայի այգու մոտից,  Արաբկիրի թաղապետարանի դիմացից։