Արյունով հայ, իսկ թափված արյունով՝ ֆրանսիացի. Միսակ Մանուշյանին և նրա զինակիցներին նվիրված հիշատակի միջոցառում Փարիզում

Հասարակություն 11:16 22/02/2021 Աշխարհում

Արյունով հայ, իսկ թափված արյունով՝ ֆրանսիացի. Միսակ Մանուշյանին և նրա զինակիցներին նվիրված հիշատակի միջոցառում Փարիզում

Փետրվարի 21-ին Փարիզում տեղի է ունեցել Երկրորդ համաշխարհայինի ընթացքում Ֆրանսիայի ազատագրման «Դիմադրություն» շարժման հայազգի ականավոր ներկայացուցիչ Միսակ Մանուշյանին և նրա զինակիցներին նվիրված հիշատակի ամենամյա միջոցառում։

Ֆրանսիայում ՀՀ դեսպանության հաղորդմամբ, հիշատակի ամենամյա միջոցառումն ավանդաբար տեղի է ունենում Փարիզի 20-րդ թաղամասում՝ Մանուշյանի անունը կրող փողոցում, ուր վեր է խոյանում Մանուշյանի և նրա խմբի անդամների վիթխարի որմնանկարը և զետեղված են նրանց սխրանքն անմահացնող հուշատախտակները։

«Խորին շնորհակալություն և գնահատանք Փարիզի 20-րդ թաղամասի ղեկավար Էրիկ Պլիեզին, ավագանու անդամներին, չնայած սանիտարական սահմանափակումներին, Մանուշյանականների հիշատակի ամենամյա ոգեկոչման ավանդույթը պահպանելու և այս տարի ևս այն պատշաճորեն կյանքի կոչելու համար։ Շնորհակալություն նաև Փարիզի ավագանու անդամներին, խորհրդարանականներին միջոցառմանը մասնակցելու և հարգանքի տուրք մատուցելու համար։

Արյունով հայ, իսկ թափված արյունով՝ ֆրանսիացի Միսակ Մանուշյանի, ինչպես նաև նրա խմբի անդամների դաժան վախճանից 77 տարի անց նրանց անձնուրաց պայքարը՝ հանուն ազատության և համամարդկային արժեքների, այսօր էլ արդիական է և ներշնչում է սերունդներին։ Մանուշյանի ազատատենչ և ինքնազոհ ոգին սնուցվում է հայ ժողովրդի արդար մաքառումից և այսօր էլ թևածում է հայրենյանց երկնքում մեր անմահ տղաների կողքին։ Հավերժ փառք և խոնարհում մեր հերոսների սխրանքին և առ հայրենիք նրանց սիրուն»,-ասվում է ՀՀ դեսպանության գրառման մեջ։

Grand merci au maire Pliez du 20e, aux élus pour commémoration dédiée au groupe de Résistance Missak Manouchian,...
Posted by Ambassade d'Arménie en France / ՀՀ դեսպանություն Ֆրանսիայում on Sunday, February 21, 2021

Տեքստում սխալ կամ վրիպակ նկատելու դեպքում, ուղարկեք խմբագրին հաղորդագրություն` նշելով տվյալ սխալը, այնուհետև սեղմելով Ctrl-Enter: