Ձեր վստահելի աղբյուրը

«Ցանկացած պետության հատուկ ծառայության համար ամոթալի է նման գործ քննելը»,- այսօր դատարանի բակում լրագրողների հետ զրույցում ասաց իրավապաշտպան Ռուբեն Մելիքյանն՝ անդրադառնալով քաղաքագետ Կարեն Բեքարյանի խափանման միջոցի հարցով քննությանը։

Նա նշեց, որ այս գործը նման է այն բանին, որ պետությունը մի օր որոշի հանցագործություն համարել տարբեր կետերում աղբ թափելը, բայց  կենտրոնանա կոնկրետ մեկ աղբակույտի վրա։

«Եվ պատկերացրեք, ուզում են գտնել այդ աղբը թափողին ու պատժել։ Օրինակ, այդ աղբակույտի մոտով մեկ օրում անցել է պայմանական 500 հոգի։ Ցուցակները կան, նայում են, որ այդտեղ մի 4-5 հոգի կան, որոնք քննադատում են, և ասում են՝ ըհը, ուրեմն այս 4-5 հոգին կլինեն։ Սա է այս գործի էությունը»,- կարծիք հայտնեց նա։

Ըստ Ռուբեն Մելիքյանի, կարևոր է հասկանալ՝ ովքեր են ֆեյքերին կառավարողները, և որքանով է դա հանցավոր արարք։

«Ինչու է սա կարևոր, քանի որ մեղադրանքներից մեկն այն է, որ պատերազմի ժամանակ այդ ֆեյքը քննադատում էր իշխանություններին, և այլընտրանքային տեղեկություն տալիս։ Այսինքն՝ երբ Արծրունը խաբում էր բոլորիս, դա հանցագործություն չէր, բայց ինչ-որ ֆեյքի տված այլընտրանքային տեղեկությունը, որը հիմա արդեն պարզ է՝ ուներ ճշմարտություններ, հանցագործություն է։ Եվս մի կարևոր բան. այդ արարքի քրեականացումը ՍԴ-ի կողմից կասեցված է»,- ասաց նա։

Իրավապաշտպանի խոսքով, տեղի ունեցողը խայտառակություն է. «Սա նշանակում է, որ մենք գործ ունենք մարդկանց հետ, որոնք այլևս իրավունք չունեն մեկի աչքերին նայել և ասել, որ իրենք իրավաբան են։ Խոսքը վերաբերում է այս գործով քննիչի դեր իրականացնող իրավաբանին»։

Ռուբեն Մելիքյանը նշեց՝ պետք է հույս ունենալ, որ Կարեն Բեքարյանի գործով դատարանն իրավաչափ որոշում կընդունի։

«Հույս ունեմ, որ այսօր կունենանք իրավունքի գերակայության, այլ ոչ թե խայտառակության հաղթանակ»,- եզրափակեց խոսքը իրավապաշտպանը։

Հիշեցնենք, որ Ազգային անվտանգության ծառայությունը ձերբակալել էր Ազգային ժողովի աշխատակազմի նախկին ղեկավար Արա Սաղաթելյանին, «Քառյակ մեդիա»-ի համահիմնադիր Կարեն Բեքարյանին և «Պառլամենտարիզմի զարգացման միջազգային կենտրոն» հասարակական կազմակերպության գրասենյակի մենեջեր Մհեր Ավագյանին և քաղաքացի Արամ Սարգսյանին:

Նրանք ձերբակալվել են Քրեական օրենսգրքի 226-րդ (կազմակերպված խմբի կողմից ազգային, ռասայական կամ կրոնական թշնամանք հարուցելը), 2262 -րդ (կազմակերպված խմբի կողմից բռնություն գործադրելու հրապարակային կոչերը, բռնությունը հրապարակայնորեն արդարացնելը կամ քարոզելը), 3074 - րդ հոդվածների (ռազմական դրության իրավական ռեժիմի ընթացքում տեղեկությունների հրապարակման կամ տարածման կանոնները խախտելը) հատկանիշներով: