Ձեր վստահելի աղբյուրը

«Եթե մարդկային կերպարանքը, բարոյականությունը կորցրած այդ էակը նման հայտարարություններ է անում, ուրեմն թող իրեն համեմատի իրենց ասած նախկինների հետ, որոնք այնքան բարոյականություն ունեին, որ չկրակեցին, երբ իրենք և իրենց առաջնորդ «ֆյուռեռիկը» գրավում էին կառավարական շենքը»,- Նիկոլ Փաշինյանի հրաժարականի պահանջով անհնազանդության ակցիայի ընթացքում ասաց ՀՅԴ անդամ Բագրատ Եսայանը՝ անդրադառնալով իմքայլական պատգամավոր Անդրանիկ Քոչարյանի հայտարարությանը, թե պետությունն ունի իրավունք կրակելու այն մարդկանց վրա, ովքեր կփորձեն գրավել կառավարական շենքերը։

Նրա խոսքով, հիմա կառավարական մի շենքից մյուսը գնալու համար Նիկոլ Փաշինյանը ամբողջ ներքին զորքերի համակարգը, ոստիկաններին հանել է փողոց։

«Սա հասկանո՞ւմ եք՝ ինչ է։ Մեր ժողովուրդը հասկանո՞ւմ է, որ Ադրբեջանի «կիրթ» նախագահի հետ համաձայնության գալուց և Արցախը հանձնելուց հետո, այս մարդը փորձում է իրենց անունից հաստատել, որ ժողովուրդը համաձայն է եղել իր հետ։ Այսինքն՝ նրանք, ովքեր չեն բողոքում, չեն պահանջում Նիկոլի հրաժարականը, ստացվում է, որ Նիկոլից ու իր կնոջից ոչ պակաս հողատո՞ւ են։ Ես ուղղակի զարմանում եմ, որ արժանապատվություն ունեցող անձինք դեռ նստած են իրենց տանը»,- ասաց քաղաքական գործիչը։

Բագրատ Եսայանը նշեց, որ խղճում է ոստիկաններին, որովհետև «անբարոյականի» հրամաններն են կատարում։