Ձեր վստահելի աղբյուրը

19․59

Քաղաքացիները երթով հասան ԱԱԾ շենքի մոտ։

19:25

Ոստիկանության շենքի մոտ գտնվող արձանի առջև ընդդիմադիր քաղաքական գործիչները ծաղիներ դրեցին։

«Ոստիկանությունը դարձել է այս իշխանության գործիքը՝ իր քաղաքացիներին ճնշելու, քաղաքացիների վրա բռնություն գործադրելու համար։ Ոստիկանության սպաներ, այսօր դուք անցել ենք բոլոր սահմանները, որպեսզի պաշտպանեք այս խելագար իշխանությանը։ Դուք պետք է հատ- հատ պատասխան տաք ձեր արածի համար։ Որևէ մեկի մտքով չանցնի, որ կմարսի այդ ամենը»,- ոստիկանության շենքի մոտ դիմելով ոստիկանության ծառայողներին՝ ասաց Իշխան Սաղաթելյանը։

Նա միաժամանակ ընթերցեց ոստիկանության այն աշխատակիցներ անունները, որոնք անօրինական գործողություններ են այսօր իրականացրել։ Իշխան Սաղաթելյանը ոստիկաններին կոչ արեց չկատարել ապօրինի հրահանգներ։

«Պահանջում ենք ոստիկանապետից ցած իջնի և բացատրություն տա այսօրվա ձեր կատարած ապօրինությունների մասին։ Դուք ձեզ պահել եք լկտի՝ ձեր գործողություններում»,- հայտարարեց նա։

Ազատամարտիկ Գևորգ Գևորգյանն էլ երթի ժամանակ նշեց. «Կապիտուլյանտը վաճառեց Հայաստանը, թիկունքից հարվածեց մեզ։ Թուրքը թույլ տվեց, որ քո արժանապատվությունը ոտնահարվի։ Դուրս արի քո արժանապատվության պայքարին, դու երիտասարդ ես, հայ երիտասարդ, դուրս արի կռվելու ու մի վախեցի ոչ մեկից։ Մի վախեցիր նապաստակներից, դուրս արի պայքարի»։

19։14

Քաղաքացիները մոտեցան Ոստիկանության շենքին, որտեղ մեծ քանակության ոստիկանական ուժեր են կենտրոնացած։ Հասնելով այստեղ երթի մասնակիցները վանկարկեցին՝ «Նիկոլ դավաճան», «Նիկոլ դավաճան»։

18:59

Այս պահին քաղաքացիները Կոյրունի անվան փողոցում են։ Երթևեկությունը միակողմանի բաց է։ Անցնող մեքենաների վարորդները ազդանշանի միջոցով իրենց աջակցությունն են հայտնում մասնակիցներին։

ՀՅԴ-ական Իշխան Սաղաթելյանը հայտնեց, որ այս պահին երթին զուգահեռ Երևանի մի շարք փողոցներում տեղի են ունենում անհանզանդության ակցիաներ։

Նա հայտնեց, որ քաղաքացիները աղբամաններով և նստարաններով փակել են Խանջյան փողոցը։ 

18։40

Նշենք, որ երթին մասնակցում են նաև զոհված զինծառայողների ծնողներ։ Նրանցից մեկը դիմելով լրագրողներին՝ ասաց. 

«Մի անազգ լպրծուն երևույթ, որը արժանապատիվ հայ ծնողին գցել է մորգերի դռները, նա տեղ չունի, իսկական մորգի ապրանքն ինքն է լինելու և իր ոստիկաններն էլ իրեն տանելու են այնտեղ։ Մի քիչ զգացմունքային եմ, բայց որպես ծնող չեմ կարողանում նման ռեակցիա չտալ»։

18:25

ՀՅԴ գործիչ Իշխան Սաղաթելյանը քայլերթի ընթացքում հայտարարեց, որ դեպի դատախազություն երթը չեղարկվում է և երթի մասնակիցները շարժվում են դեպի ԱԱԾ շենք, որից հետո ՝ Ոստիկանություն։

«Ամեն ինչ շատ պարզ է՝ թույլ չենք տալու, որ Նիկոլ Փաշինյանը, հենվելով ոստիկանության վրա, մեր երկրում հաստատի բռնապետություն։ Մենք թույլ չենք տալու, որպեսզի պետական տերորի միջոցով մեր երկրում հաստատվի մեկ մարդու դիկտատուրա։ Ոստիկանության հարգելի սպաներ, դիմում եմ ձեզ, ուշքի եկեք, մի ծառայեք այդ խելագարին, մի ենթարկվեք այդ խելագարի ապօրինի հրահանգներին, կանգնեք ժողովրդի կողքին, փրկենք մեր երկիրը»,- հայտարարեց նա։

18:17

Նիկոլ Փաշինյանի հրաժարականի պահանջով՝ քաղաքացիները երթով շարժվում են Դատախազության, այնուհետև Ոստիկանության շենքի մոտ։

Քայլերթը մեկնարկել է Արամ Մանուկյանի արձանի մոտից։  

Հիշեցնենք, որ «Հայրենիքի փրկության շարժման» կոչով այսօր քաղաքացիները հավաքվել էին նաև  ՀՀ կառավարական 3-րդ շենքի առջև՝ խոչընդոտելու վարչապետ Փաշինյանի մուտքը տվյալ շենք:

Նիկոլ Փաշինյանը կառավարական 3-րդ շենքին է մոտեցել «դավաճան» վանկարկումների ներքո։