Ձեր վստահելի աղբյուրը

Երևան քաղաքի ընդհանուր իրավասության դատարանում, դատավոր Մեսրոպ Մակյանի նախագահությամբ, այսօր հրապարակվեց «Սասնա ծռեր» խմբի 10 անդամների գործով դատավճիռը:

Դատավճռով Արմեն Բիլյանն արդարացվեց ոստիկան Գագիկ Մկրտչյանի սպանության համար:  Դատավորն ասաց, որ  գործն այս առումով վերադարձվում է դատախազին Գագիկ Մկրտչյանի սպանության, հնարավոր սպանության կամ հնարավոր մահվան մեջ մեղավոր անձանց քրեական պատասխանատվության հարցը լուծելու և քրեական պատասխանավության ենթարկելու նպատակով:

Մ. Մակյանը նշեց, որ դատարանն արձանագրել է՝ այս գործի քննությամբ այս առումով  սպառվել են բոլոր այլ ապացույցներ ձեռք բերելու հնարավորությունները, որոնք կարող են ապացուցել Բիլյանի մեղքն իրեն մեղսագրված արարքում:

Լրագրողների հետ զրույցում Գագիկ Մկրտչյանի կինը՝ Հասմիկ Ոսկանյանն ասաց, որ ամենացավոտն այն է՝ նորից սկսվելու է քաշքշուկ, նոր քննություն, իսկ այդ ընթացքում այդ մարդիկ կրկին ազատության մեջ են մնալու:

«Ամենադաժանն այն է, որ տղաները հիմա հողի տակ են, իսկ իրենք ազատ ման են գալիս, ազատության մեջ են: Կապ չունի՝ ով է արել»,- նշեց նա:

Հիշեցենք, որ ՊՊԾ գնդի գրավման հետևանքով զոհվել են գնդապետ Արթուր Վանոյանը, լեյտենանտ Յուրի Տեփանոսյանն ու ավագ ենթասպա Գագիկ Մկրտչյանը։