Ձեր վստահելի աղբյուրը

«Բժիշկները միշտ եղել են ժողովրդի կողքին, միշտ եղել են բանակի կողքին, նրանք ապաքաղաքական մարդիկ են, բայց դա երբեք չի նշանակել, որ մենք չենք ունեցել մեր քաղաքացիական դիրքորոշումը»,- այսօր Ազատության հրապարակում անցկացվող հանրահավաքի ընթացքում ասաց «Իզմիրլյան» բժշկական կենտրոնի տնօրեն Արմեն Չարչյանը, ում ղեկավարած ԲԿ-ում բազմաթիվ վիրավոր զինծառայողներ են բուժում ստանում։

Նրա խոսքով, իրենց քաղաքացիական դիրքորոշումը համահունչ է այսօրվա հրամայականին, և այսօրվա բարեկեցիկ, առողջ ապրելու պահանջին։

«Շնորհիվ բժիշկների՝ Արցախյան առաջին հերոսամարտի ժամանակ վիրավորների մոտ 70 տոկոսը հետ վերադարձավ պատերազմ։ Ի շնորհիվ բժիշկների՝ մենք կարողացանք ձևակերպել այնպիսի օրակարգ, որն այսօր մեզ համար հրամայական է՝ ապրել, արարել ու շատանալ, հաղթել։ Իսկ այսօրվա հաղթանակը կարող է լինել միմիայն մեր ազգի համախմբմամբ։ Մենք երբեք չենք տարանջատել սևը սպիտակից»,- նշեց նա։

Արմեն Չարչյանը հանրությանը խնդրանքով դիմեց, որ ամենքն իր խղճով ու մտքով պայքարի հայ ազգը թուրքերից ազատագրելու համար։

«Մեր ազգի այն տարրերից, որոնք ազգադավ են, ու որոնք չեն կարողանում ղեկավարել, պետք է ազատվել։ Մենք ունենք կորուստներ, և ինձ համար մեկ է՝ դա դավաճանության, թե ապաշնոր կառավարման արդյունք է, ինձ համար կարևոր է, որ էլ նման կորուստներ չունենանք։ Մենք՝ որպես բժշկական հանրություն, կանգնած ենք մեր ազգի, մեր բանակի կողքին»,- եզրափակեց խոսքը Արմեն Չարչյանը։