Ձեր վստահելի աղբյուրը

«Երբ ես առավոտյան կարդացի Զինված ուժերի գլխավոր շտաբի կոչը, որին սպասում էինք առնվազն նոյեմբերի 9-ից, առաջինը, որ մտածեցի այս էր՝ սա մեր լույս տղաների պահանջն է: Սա մեր լույս տղերքի կոչն է, որ եղավ այսօր»,- Ազատության հրապարակում Հայրենիքի փրկության շարժման հանրահավաքին ասաց «Ճշմարտություն սերունդների համար» նախաձեռնության հիմնադիր, քաղաքագետ Գեղամ Նազարյանը, ում որդին զոհվել է պատերազմի ժամանակ:

«Ինչ-որ մեկը մեր ժողովրդին ուզում է տանել փորձության, սիրտը նոր «մարտի 1» է ուզո՞ւմ: Դրանից խուսափելու մի տարբերակ կա. մենք բոլորս այսօր պետք է լինենք այստեղ և այնքան մնանք, մինչև այդ տղան, կամ չգիտեմ ինչը հասկանա, որ ինքը Հայաստանում այլևս մի անելիք ունի՝ գնա և նստի այն խցում, որն իր համար նախատեսված է:

Մենք արդեն հաղթել ենք, մնում է ամրագրենք այդ հաղթանակը: Մենք միասնական ենք, քան երբեք»,- նշեց նա:

Գ.Նազարյանը կոչ արեց ԱԳՆ-ին՝ հանդես գալ նմանատիպ կոչով, ինչ կոչով հանդես եկավ ԶՈւ Գլխավոր շտաբը:

«Թուրքիայի ԱԳ նախարարն իր զորակցություն է հայտնում Նիկոլ Փաշինյանին: Դուք կողմնորոշվեք՝ այս կողմում եք, թե այն կողմում: Ժամանակ ունեք: Ժամանակ ունեն նրանք, որոնք գնացել են Հանրապետության հրապարակ, որ այդ ողորմելու հավաքին մասնակցեն: Դուք մարդ եք, շրջվեք և եկեք այստեղ:

Ով կանգնի Նիկոլի կողքին, ներծծվելու է նրանով, դառնալու է Նիկոլ իր բոլոր հետևանքներով:

Սիրելի հայրենակիցներ: Այսօր պատմական օր է, Զորավար Անդրանիկի ծննդյան օրն է, այսօր մեր հաղթանակի սկզբի օրն է: Մենք լավ, հզոր Հայաստան ենք ունենալու, մեր տղերքը հենց այնպես չեն զոհվել»,- ասաց նա: