Ձեր վստահելի աղբյուրը

«Ճակատագրի ծաղրը կայանում է նրանում, որ իրեն ամենաժողովրդավար հայտարարած վարչապետը վերջին ամիսներին տեղաշարժվում է հսկայական զորքի ուղեկցությամբ»,- այս մասին Նիկոլ Փաշինյանի հրաժարականի պահանջով Բաղրամյան պողոտայում լրագրողներին ասաց «ՎԵՏՕ» շարժման անդամ Նարեկ Մալյանը։

««Ժողովրդավարություն» և այլ բարձրակոչ բառեր, որոնք արտաբերում են, իրականում զրո արժեք ունեցող երևույթներ են։ Ինչի՞ց է վախենում վարչապետը։ Բա թող դուրս գա առանց զորքի քայլի։ Այսօր տեղի ունեցավ մի հետաքրքիր բան։ Այսօր ԱԱԾ-ի ցույցն էր։ ԱԱԾ-ի հետ դուրս էր եկել ցույց անելու»,- ասաց նա։ 

Նա նաև նշեց. «Ձեզ տեղյակ պահեմ, որ սորոսականները շատ վախեցած են, խուճապի մեջ են ուղղակի գտնվում, որովհետև հասկանում են, որ այս պրոցեսների արդյունքում նաև ավարտվելու են իրենք»։

Անդրադառնալով թուրք պաշտոնյայի հայտարարությանը՝ ի աջակցություն Փաշինյանի, Մալյանն արձագանքեց․

«Եթե առաջ ասում էին՝ «թուրքը կտեսնի, կուրախանա», հիմա պարզվեց, որ թուրքը ոչ թե տեսնում, ուրախանում է, այլ ակտիվ մասնակցում է պրոցեսներին։ Թուրքն այսօր երթ էր անում Երևանի փողոցներով, իրենց դրածոն է»։