Ձեր վստահելի աղբյուրը

Սևանի քաղաքապետարանում բողոքի ակցիա է։ Քաղաքացիները դժգոհում են, որ իրենց սեփականության վրա նոր նախագծեր են մշակում, ինչն ապօրինի գործընթաց է։

«Իշխանությունը պարտավոր է օրենքը պաշտպանել, բայց իրենք սկսում են մեր սեփական տարածքի վրա առանց մեզ տեղյակ պահելու ծրագրեր նախագծել։ Ո՞նց են որոշել, որ իրենք պետք է մեր սեփականությունը տնօրինեն։ Եթե իրենք մտածում են Սևանում բիզնեսի զարգացմանը խթանել, որ հանգստյան գոտիներ ստեղծվեն, իրենք պետք է նախ և առաջ կոմունիկացիոն հարցեր լուծեն։

Ինչո՞ւ է Սևանի ամբողջ տարածքը ցանկապատված, քանի որ օրենքը չի գործում։ Այսինքն՝ դու վստահ չես, որ օրենքը պաշտպանում է քո իրավունքը, ու դու ստիպված «չինական պատեր» ես կառուցում»,- ասաց քաղաքացիներից մեկը։

Նշենք, որ կառավարության ներկայացրած նախագիծը, ըստ որի լճի մոտակայքում գտնվող կառույցները պետք է քանդվեն, դեռ հանրային քննարկման փուլում է, բայց քաղաքացիները չեն համաձայնում գրանցվել, որպեսզի հանրային քննարկման առաջին փուլը սկսվի։