Ձեր վստահելի աղբյուրը

Այս իշխանությունը հոգեվարքի մեջ է, նա փորձում է ժողովրդին բանակի դեմ հանել, դա իր ձեռագիրն է, ժողովրդին բաժանել տարբեր հատվածների և բախումներ հրահրել, դրա համար մեզ պետք է վճռականություն և զսպվածություն: Այսօր մենք պետք է Նիկոլ Փաշինյանին դեն շպրտենք, և սկսենք պայքարի երկրորդ փուլը՝ վերականգնել մեր հայրենիքը և ստեղծել արդար, հզոր Հայաստան»,- այսօր Ազատության հրապարակում «Հայրենիքի փրկության շարժման» ակցիայի ժամանակ ասաց շարժման վարչապետի միասնական թեկնածու Վազգեն Մանուկյանը:

Նրա խոսքով, այսօր բանակի և ժողովրդի միասնության օրն է, այսօր դա առավել շատ է ընդգծվել։ Միևնույն ժամանակ, Վազգեն Մանուկյանն ընդգծեց, որ սա հեղաշրջում չէ, բանակը ունի սահմանադրական իրավունք նշել ամենակարևոր թշնամուն, որը սպառնում է ՀՀ անվտանգությանը։

«Դա Նիկոլ Փաշինյանն է: Մեր անվտանգության ամենամեծ սպառնալիքն այդ մարդն է, որը և պետք է հեռացվի»,- նշեց նա:

Վազգեն Մանուկյանը կոչ արեց Ոստիկանությանը, ԱԱԾ-ին և պետական մյուս կառույցներին, որպեսզի նրանք միանան բանակին, միասնական հայտարարություն անեն և պահպանեն ժողովրդի անդորրը։

«Կոչ եմ անում նաև «Իմ քայլը» խմբակցության պատգամավորներին, որոնք ընկել են ծուղակի մեջ, դուրս եկեք այդ ծուղակից, խմբակցությունից, մի վերցրեք այդ սև բիծը ձեր վրա, միևնույն է՝ պատմության մեջ Նիկոլ Փաշինյանի վրա մնալու է սև բիծ։ Կոչ եմ անում ժողովրդին, հավաքվել այստեղ, մենք պետք է վերջացնենք այն, ինչ սկսել ենք: Դիմում եմ շրջանների ժողովրդին, որ տեղերում հանրահավաքներ անեմ, ինչքան շատ ու հզոր լինենք, այնքան դժվար կլինի նրա համար՝ բախումներ առաջացնել»,- ասաց նա: