Ձեր վստահելի աղբյուրը

«Որևէ կասկած չունեմ՝  ճիշտ աշխատանքի դեպքում գերիների վերադարձի հարցը կարելի էր լուծել շատ ավելի շուտ ու մինչ այսօր չէինք ունենա այս խայտառակ վիճակը»,- Ազգային ժողովի դիմաց լրագրողների հետ զրույցում ասաց «Հայրենիք» կուսակցության նախագահ Արթուր Վանեցյանը։

Հարցին՝ ասում է, որ իշխանություն լինելու դեպքում կկարողանա իր աշխատանքի շնորհիվ վերադարձնել գերիներին, առաջարկե՞լ է արդյոք իր օգնությունը, նա պատասխանեց. «Սա պայման չէ, կամ ինքնանպատակ չէ իշխանություն լինելը, կամ պայման եմ դնում՝ եթե լինեմ իշխանություն, կկարողանամ վերադարձնել  գերիներին։

Ոչ, ասում եմ, որ եթե մենք լինենք իշխանություն և օգտվենք իշխանական լծակներից, օգտագործելով մեր կապերը, հնարավորությունները, որոնք ձեռք են բերվել տարիների ընթացքում, հնարավոր է այդ հարցը լուծել։ Բայց առանց պաշտոնապես Հայաստանը ներկայացնելու, ուղղակի հնարավոր չէ այդ հարցը լուծել»։

Արթուր Վանեցյանը նշեց, որ իշխանությունների ապաշնորհ աշխատանքի արդյունքում եկան ու հասան այն կետին, որ Ադրբեջանի նախագահ Ալիևն իրեն թույլ է տալիս հայտարարել, որ այլևս հայ գերիներ չկան, ով էլ կա՝ դիվերսանտներն են։

Ինչ վերաբերում է Զինված ուժերի գլխավոր շտաբի պետ Օնիկ Գասպարյանին աշխատանքից ազատելու Փաշինյանի առաջարկին, Ա. Վանեցյանը հույս հայտնեց, որ ՀՀ նախագահը կիրականացնի իր սահմանադրական լիազորությունները, առարկություններով Փաշինյանի առաջարկությունը հետ կվերադարձնի նրան, քանի որ սա սովորական իրավիճակ չէ.

«Այսքան մարդ փողոց է դուրս եկել, կանգնել է մեր երկրի հիմքերի պաշտպանության համար և երկրի հիմնական պաշտպանները՝ ՀՀ Զինված ուժերը, հայտարարություն են արել՝ նշելով, որ Փաշինյանն այլևս ի վիճակի չէ ապահովել երկրի անվտանգությունը, և նա պետք է գնա։

Կարծում եմ՝ նախագահն անպայման ականջալուր կլինի զինվորականների հայտարարությանը և իր լիազորությունների շրջանակներում Օնիկ Գասպարյանին ազատելու առաջարկությունը առարկություններով կվերադարձնի կառավարություն»։

Նա նշեց, որ Հայրենիքի փրկության շարժման պայքարը շարունակվում է, ամենօրյա ռեժիմով ավելի հզորանում է, ավելի շատ մարդիկ են մասնակցում, անգամ գիշերային ժամերին Բաղրամյան պողոտան մարդաշատ է։

«Մեզ քննադատում են, որ վճռական քայլեր չենք անում, շենքեր չենք գրավում, բայց տեսեք, թե ովքեր են Հայրենիքի փրկության շարժման անդամները և կհասկանաք, որ այս շարժման մեջ ընդգրված մարդիկ առաջինը նայում են պետական շահը, թե մեր քայլերից հետո ինչ կլինի պետության հետ։ Մեր կողմից պետական շահը միշտ առաջ է մղվում, դրա համար փորձում ենք մեր բոլոր քայլերն իրականացնել սահմանադրական ճանապարհով և սահմանադրության շրջանակներում»,- ասաց «Հայրենիք» կուսակցության նախագահը։