Ձեր վստահելի աղբյուրը

«Երկրի ստեղծված վիճակն աննախադեպ է: Այստեղ չկա քաղաքական խնդիր, կա հայրենիքի փրկության հարց»,-ԱԺ  դիմաց լրագրողների հետ զրույցում ասաց «Հայրենիք» կուսակցության անդամ, իրավաբան Արսեն Բաբայանը:

Նա նշեց, որ բոլոր մարդիկ,  կազմակերպությունները, կառույցները, որոնք պահանջել են այս իշխանությունների հրաժարականը, մեծամասնությունը քաղաքական գործունեությամբ չեն զբաղում, հենց դա էլ ապացուցում է, որ սա հայրենիքի փրկության համար մղվող պայքար է:

Ա. Բաբայանն ասաց, որ Ազգային ժողովը, մասնավորապես «Իմ քայլը»  խմբակցությունը, պարտավոր է այսօր վերջնականապես լուծել այս հարցը, որովհետև երբ բանակն է  հայտարարություն անում, ինչը Հայաստանի Հանրապետության ողջ պատմության ընթացքում աննախադեպ երևույթ է, պարզ մի բան է նշանակում՝  այս մարդիկ չունեն իշխանություն:

Նա վստահ է, որ ինչպես բանակի համբերության բաժակը լցվեց ու հայտարարությամբ հանդես եկավ՝ պահանջելով Փաշինյանի ու կառավարության հրաժարականը, այնպես էլ մի օր ԱԱԾ-ում, դատախազությունում, ոստիկանությունում ու ՀԾՔ-ում ուսադիր կիրողներն այլևս չեն կարող տանել այս դավաճանական գործողությունները:

Ա. Բաբայանն ասաց, որ Հայաստանում որևէ ռազմական հեղաշրջման փորձ չի արվել, նման փորձ տեսնում է միայն Փաշինյանն ու Թուրքիայի իշխանությունը:

«Թող տեսնեն: Իսկ ի՞նչ է կատարվում, կրկնում եմ՝ սա միայն քաղաքական հարց չէ, բանակը Հայաստանի անվտանգության երաշխավորն է, բանակը տեսնում է, որ Հայաստանի անվտանգությունն խաթարված է հենց այս ապիկարի դավաճանի պատճառով, բանակը պաշտպանում է  Հայաստանի անվտանգությունը:

Բանակը տեսնում է, որ հրամանատար չունի, հրամանատարը  երկիրը տարել է ու շարունակում է  տանել ամենավատ ճաապարհներով»,- նշեց նա:

Ըստ Ա. Բաբայանի, 2-3 ամիս մի բան են ասում՝ առանց ցնցումների հեռացիր, իրենք ամեն ինչ անում են սահմանադրական ճանապարհով, հորդորում են Փաշինյանին նույնպես  սահմանադրական ճանապարհից չշեղվի: