Ձեր վստահելի աղբյուրը

«Մենք ծայրաստիճան մտահոգված ենք Հայաստանում տեղի ունեցող վերջին զարգացումներով», - այս մասին ասել են Հայաստանի հարցով ԵԽԽՎ մոնիտորինգի համազեկուցողներ Բորիանա Աբերգը (Շվեդիա) և Կիմմո Կիլյունենը (Ֆինլանդիա):

Համազեկուցողները, մասնավորապես, «անընդունելի են համարում զինված ուժերի գլխավոր շտաբի գրասենյակի կողմից երեկ տարածված հայտարարությունը, որով կոչ է արվում ժողովրդավարական ճանապարհով ընտրված կառավարության հրաժարականը»:

«Մենք կոչ ենք անում բոլոր քաղաքական ուժերին և պետական դերակատարներին՝ ամբողջությամբ հարգել Հայաստանի ժողովրդավարական սկզբունքներն ու Սահմանադրությունը և ձեռնարկել բոլոր անհրաժեշտ քայլերը` ստեղծված իրավիճակի անհապաղ ապաէսկալացիայի համար», - ասում են նրանք։

«Հայաստանն իր նորագույն պատմության շատ դժվար փուլ է ապրում և, առավել քան երբևէ, կարիք ունի հանգստության, զսպվածության, իմաստության և բոլոր շահագրգիռ կողմերից ժողովրդավարական սկզբունքներին անսասան աջակցության՝ իր առջև ծառացած քաղաքական ճգնաժամը լուծելու համար»,- նշվում է հայտարարության մեջ։