Ձեր վստահելի աղբյուրը

«Երբ բանակի ղեկավարության հայտարարությունը հրապարակվեց, գործադիր իշխանության ղեկավարը, ոչ ավել, ոչ պակաս, հեղինակազրկելց Հայաստանը, հայոց բանակը, ժողովրդին, հրապարակավ կեղծեց իրավիճակը՝ ասելով, թե իբր ռազմական հեղաշրջման փորձ է»,-Բաղրամյան պողոտայում  հայտարարեց ՀՅԴ ԳՄ անդամ Արծվիկ Մինասյանը և հավելեց, որ դրանից օգտվեցին Թուրքիան և Ադրբեջանը՝ փորձելով իրենց հերթին հեղինակազրկել Հայաստանը:

Ըստ Մինասյանի, Նիկոլ Փաշինյանը ցանկանում էր բախումներ հրահրել, և եթե չլիներ Ազատության հրապարակում հավաքվածների պատասխանատվության բարձր աստիճանը և հայրենիքի անվտանգության գիտակցումը, ապա բախումներն անխուսափելի էին դառնալու:

«Գլխավոր սադրիչը կրկին ցանկանում էր հայի արյուն թափել Երևանում»,- նկատեց Արծվիկ Մինասյանը:

Նա հայտնեց, որ Փաշինյանը հանրահավաքի ժամանակ արած իր ուղերձներով ցույց տվեց իր անբարտավանության, անամոթության և անբարոյականության մաստերկլաս, քանի որ ՀՀ ԶՈԻ ԳՇ պետին պաշտոնից ազատման միջնորդություն ներկայացնելուց հետո նրան դիմեց «Օնիկ ջան»-ով:

«Հաստատվել է, որ անհավասար պատերազմ սադրելու, կանխամտածված պատերազմը պարտության տանելու, հայրենիքի զգալի մասը թշնամուն հանձնելու ուղիղ մեղադրանքը հենց Փաշինյանին է ուղղված»,- հայտարարեց ՀՅԴ ներկայացուցիչը:

Նա  նկատեց, որ հայ ժողովուրդը հետևողականորեն հայրենիքի փրկությունն իր համար դարձրել է ապրելակերպ և բողոքը չի դադարելու այնքան ժամանակ, քանի դեռ չի հասնելու իր հիմնական նպատակին՝ հայրենիքի, պետության, ժողովրդի թիվ մեկ դավաճանի հեռացմանը գործադիր իշխանության իր կառչած աթոռից:

Մինասյանի խոսքով՝ բանակի և քաղաքական ուժերի միջև գաղտնի բանակցություններ չկան, բանակն ընդամենը կանգնել է ժողովրդի կողքին և արձանագրել, որ կառավարության ղեկավարը և կառավարությունն ադեկվատ չեն, ինչը նշանակում է, որ նրանց կայացրած ցանկացած որոշում վնաս է հայոց պետական շահին:

Նա նաև հավելեց, որ ԳՇ հայտարարության մեջ նաև ասվում է, որ որևէ ձևով իշխանությոնը չի կարող ուժ գործադրել ժողովրդի վրա, եթե նման բան լինի, ապա բանակն իր ամբողջ կազմով փաստացի պետք է արձագանքի դրան: