Ձեր վստահելի աղբյուրը

«Տեղեկացնեմ, որ երեկ և այսօր իշխանությունը բոյկոտել է ԱԺ խորհրդի նիստերը, և մենք չենք կարողացել քննարկել ընդդիմության առաջարկած՝ ռազմական դրությունը հանելու մասին հարցը»,- այսօր «Հայրենիքի փրկության շարժման» հանրահավաքի ընթացքում ասաց ԱԺ «Բարգավաճ Հայաստան» խմբակցության պատգամավոր Արման Աբովյանը։

Նրա խոսքով, իրենք ամեն ինչ անում են, որ սրացումներ չլինեն, սակայն իշխանությունը փաստացի հրաժարվում է գործել սահմանադրության շրջանակներում։

«Սա ակնհայտ ցույց է տալիս, որ իշխանությունը ոչ մի պարագայում պատրաստ չէ և չի ուզում դուրս գալ այն կաղապարներից, այն զուգահեռ Հայաստանից, որտեղ ամեն ինչ լավ է։ Իշխանությունը չի ուզում առերեսվել իրականությանը»,- նշեց նա։

Արտահերթ նիստը նախաձեռնել էին խորհրդարանական ընդդիմադիր ուժերը, իսկ իշխանությունն ուղղակի տապալեց այն։

«Այդ քայլերը ցույց են տալիս իշխանության իրական թե՛ լեգիտիմություն, թե՛ նպատակները»,- նկատեց նա։