Ձեր վստահելի աղբյուրը

Հանրապետության նախագահ Արմեն Սարգսյանի կողմից մի լուծում կա՝ առարկություններով հետ ուղարկել փաստաթուղթը։ Բաղրամյան պողոտայում լրագրողների հետ զրույցում հայտարարեց Հայրենիքի փրկության շարժման կողմից վարչապետի միասնական թեկնածու առաջադրված Վազգեն Մանուկյանը՝ պատասխանելով հարցին, թե ինչպե՞ս կվարվի ՀՀ նախագահը։

«Ուրիշ լուծում գոյություն չունի»,- ընդգծեց Վազգեն Մանուկյանը։

Լրագրողները նրան հիշեցրեցին՝ երեկ հայտարարել է, որ բանակը պետք է ընդվզի, ի՞նչ նկատի ուներ Մանուկյանն այդ ասելով, վերջինը պատասխանեց. «Ես համոզված եմ, որ Արմեն Սարգսյանն առարկությունով հետ կուղարկի փաստաթուղթը, հակառակ դեպքում, կլինի Ալիևի ասածը, որն ասաց՝ Հայաստանը մահացած է ու էլ ոտքի չի կանգնի։ Ես համոզված եմ Արման Սարգսյանի որոշման մեջ։ Ես երեկ ասացի, եթե այնուամենայնիվ նման բան չլինի, ապա բանակը չպետք է ենթարկվի անօրինական հրամանների»։

Մանուկյանն ասաց, Արմեն Սարգսյանը ոչինչ չի խոստացել, բայց ինքը վստահ է, որ նա այդպես էլ կանի, քանի որ ուրիշ տարբերակ չկա։

Նա կոչ արեց ոստիկանությանն ու ԱԱԾ-ին սատար կանգնել բանակին։