Ձեր վստահելի աղբյուրը

«Մեր հասարակությունը հիվանդ է, ցավ է ապրում, ցավ է ապրում դեռևս 2018 թվականի մայիսից, այդ ցավը պետք է ամոքել»,- Բաղրամյան պողոտայում մեկնարկած Հայրենիքի փրկության շարժման կազմակերպած հիշատակի և զորակցության հավաքին ասաց բժշկական գիտությունների դոկտոր, դոցենտ, «Իզմիրլյան» կենտրոնի տնօրեն Արմեն Չարչյանը։

Նա նշեց, որ բժշկական հանրության գիտակից խումբը չի կարող անհողդողդ մնալ այն ցավին, որ ապրում է  մեր հասարակությունը։

«Տեսնում ենք, որ հասարակությունը տառապում է։ Համեմատելով բժշկական տերմինաբանության հետ, ասեմ՝ մեր հասարակությունը տառապում է քաղցկեղով, իսկ քաղցկեղը պետք է կտրել, հեռացնել, դրանից հետո լուրջ աշխատանք կատարել, որպեսզի հասարակությունն առողջանա, իր արժանապատիվ ու բարեկեցիկ տեղը զբաղեցնի  աշխարհի ժողովուրդների կողքին։ Մենք այսօր գլխիկոր ենք, սակայն այդ կտրելու գործընթացը շատ դժվար է լինելու»,- նշեց բժիշկը։

Ա. Չարչյանը համոզված է, որ հայ  ժողովուրդը կկարողանա հաղթահարել բոլոր մարտահրավերները, արհավիրքները, դրա առաջին գրավականն այն է, որ պետք է ունենալ ազգային օրակարգ, փիլիսոփայություն, ազգային գաղափարախոսություն։

«Ներկա իշխանությունը երեք տարում ձևավորեց միայն ապազգային, հակազգային գաղափարախոսություն, հակաազգային փիլիսոփայություն, նրանց բոլոր արարքները, գործերը հանգեցնում են նրան, որ մենք միանշանակ պետք է մերժենք նիկոլզիմը, բոլոր նրանց, ովքեր պատճառ հանդիսացան մեր հուսահատության, գլխիկորության։

Մենք պետք է ապրենք արժանապատիվ, բարեկեցիկ, բարձր գլխով։

Պայքարենք մինչև վերջ մեր ազգի, մեր պետության համար»,- ասաց Ա.Չարչյանը։