Ձեր վստահելի աղբյուրը

Սուրբ Աթոռում ՀՀ նախկին դեսպան Միքայել Մինասյանը Թելագրամի իր ալիքում անդրադարձել է Yerkir.am-ի հրապարակած տեղեկություններին, որոնց համաձայն ծեծել են  այն երիտասարդին, որ Փաշինյանը սպառնացել էր՝ «Քո հետևից կգան»։

«Մենք չենք հիշում այն երիտասարդի մասին, որը նստել էր ԱԺ-ում Արարատ Միրզոյանի աթոռին, և որին մահացած գտան կամրջի տակ։ Մենք չենք հիշում լրագրող Մհեր Եղիազարյանին, որը 2019-ի հունվարին բանտում մահացավ 45-օրյա հացադուլից հետո»,-նշել է նախկին դեսպանը։

Միքայել Մինասյանն ուշադրություն է հրավիրում փաստին, որ բոլոր իրավապաշտպանները, ՀԿ-ները, դեսպանությունները լռում են՝ «չհասկանալով, որ իրենց լռությամբ դառնում են մասնակից դիկտատուրային»։

«Եվ թող ոչ մեկին չթվա, որ այդ լռությունը պատահական է։ Բոլոր այդ լռողները նիկոլյան ռեժիմի ուղիղ շահառուներն են, եթե ոչ սցենարիստները։ Եվ ահա, այդ ամենը չի մոռացվելու։ Խոստանում եմ»,-նշել է Մ. Մինասյանը։

Հիշեցնենք, որ նոյեմբերի 9-ի գիշերը՝ կապիտուլյացիայի փաստաթուղթը ստորագրելուց հետո բողոքի գործողությունների ժամանա ԱԺ դահլիճ մտած երիտասարդներից մեկին՝ Գառնիկ Պետրոսյանին օրեր անց գտել էին մահացած Կիևոյան կամրջի տակ։

Նոյեմբերի 14-ին Աջափնյակ և Դավթաշեն վարչական շրջանների քննչական բաժնում հարուցվել է քրեական գործ՝ ՀՀ քրեական օրենսգրքի 110-րդ հոդվածի (ինքնասպանության հասցնելը) 1-ին մասով։

Ավելի ուշ ՔԿ-ից Panorama.am-ին հայտնել էին, որ գործն ուղարկվել է ԱԱԾ։