Ձեր վստահելի աղբյուրը

«Այս ֆիլմը Արա Սաղաթելյանի մասին է: Այն մարդու մասին, ով հայ-ադրբեջանական տեղեկատվական պայքարի առաջնորներից մեկն է և որի մասին փաստերով պատմում են իր անվանի գործընկերները՝ հայկական լրատվական դաշտի ուժեղագույնները:

Այսօր Արա Սաղաթելյանը շինծու քրեական գործով ՔԱՂԲԱՆՏԱՐԿՅԱԼ է:

ԱԶԱՏՈՒԹՅՈՒՆ ՔԱՂԲԱՆՏԱՐԿՅԱԼ ԱՐԱ ՍԱՂԱԹԵԼՅԱՆԻՆ»,- ֆեյսբուքյան էջում գրել է պրոդյուսեր Ռուբեն Մխիթարյանը՝ ներկայացնելով «Արմնյուզ» հեռուստաընկերությունը պատրաստած «Մի հայի պատմություն. Արա Սաղաթելյան» ֆիլմը անազատության մեջ գտնվող Արա Սաղաթելյանի մասին։

Ֆիլմում մեդիաոլորտի ներկայացուցիչները ներկայացնում են իրենց կարծիքը, խոսքը, գնահատականը Սաղաթելյանի մասին։

Պրոդյուսեր Ռուբեն Մխիթարյանի ֆիլմում Արա Սաղաթելյանի մասին են խոսում   

«Արմենիա» հեռուստաընկերության լրատվական բաժնի ղեկավար Արտակ Ալեքսանյանը. 
«Հանրային կապերի և տեղեկատվության կենտրոն» ՊՈԱԿ-ը ստեղծվել էր չափազանց մեծ կարիքից դրդված, քանի որ տեսանելի էր թե ինչպես Ադրբեջանը մեծ ռեսուրսներ էր ներդնում ամբողջությամբ ձևափոխելու և ձևախեղելու Արցախյան հակամարտության և տարածաշրջանի պատմությունը: Այդ իմաստով ՊՈԱԿ-ի գործունեությունը դարձավ չափազանց հանգուցային։

2016 թ ռեկորդային էր միջազգային մամուլի ներգրավման առումով: Երբեք հայ-ադրբեջանական հակամարտության ժամանակ այդքան միջազգային մամուլ չի եղել Հայաստանում։ Եկել էին բոլոր հայտնի լրատվական գործակալությունները և ոչ միայն քառօրյայի ժամանակ, այլև դրանից հետո էլ երկու ամիս հոսքը չէր դադարում»:

«Հրապարակ» օրաթերթի խմբագիր Արմինե Օհանյանը.
«Բազում պատճառներ կարող եմ թվել, թե ինչու մինչև 2020 թվականն Ադրբեջանը չեր կարողանում լայնածավալ հարձակում սկսել։ Դրանցից մեկն էլ այն էր, որ դրսի տեղեկատվական դաշտում մենք լավ աշխատանք էինք տանում, և իրենք գիտեին, որ չեն կարողանալու իրենց տեսակետը միջազգային հանրությանը հասցնել, իսկ դրա մեջ մեծ լումա ուներ Արա Սաղաթելյանը:

Այնպես որ, կարող ենք համարել, որ այս պարտության մեջ փոքր, կամ մեծ բաժին ունի նաև այն, որ Արա Սաղաթելյանի, իր ղեկավարած ՊՈԱԿ-ի կատարած աշխատանքն այս իշխանությունները չգնահատեցին, ոչնչացրին, իրեն էլ բանտում փակեցին»:

Քառյակ Մեդիայի Գլխավոր տնօրեն Արամ Անտինյանը. 
«Արա Սաղաթելյանի փոքր թիմը կարողացել է տարիներ շարունակ հակակշռել այն միլիոնավոր դոլարներին, որը ծախսում էր թշնամին՝ պրոադրբեջանական քարոզչության համար։...   Այն որ հիմա ունենք այս վիճակը, և միջազգային լրատվամիջոցները չեն անդրադառնում Հայաստանի, այլ անդրադառնում են պրոադրբեջանական տեսանկյունից, հուշում է մի բան՝ որ Արա Սաղաթելյանի օղակը պակաս էր:

Եթե այն ժամանակ Ադրբեջանն ուներ միլիոնավոր դոլարներ, մենք ունեինք Արա Սաղաթելյանի նման նվիրյալներ, որոնք պահում էին մեր երկրի պատիվը և իմիջը»։ 

«168 am» կայքի խմբագիր Սաթիկ Սերյանյանը. 
«ՊՈԱԿ-ը համալրված էր ոչ թե լրագրողներով, այլ ադրբեջանագետներով, փորձագետներով, որոնք ապահովեցին այդ հաղթարշավը մեդիա դաշտում»: 

«Առկա» լրատվական գործակալության տնօրեն Կոնստանդին Պետրոսովը. 
«Արա Սաղաթելյանից բացի ոչ մեկը չէր կարող ստեղծել նման կենտրոն, որտեղ հրավիրվել էին փորձագետներ, ոչ միայն Հայաստանից այլև արտասահմանից: Այն մեծ ներդրում էր իր կողմից պետության շահերի տեսանկյունից և արվել է մեծ աշխատանք, որը տեսանելի էր։ ԵՎ պետությունը, երևի, պետք է գնահատեր այն արդյունքը որը կատարել է կենտրոնը Արա Սաղաթելյանի ղեկավարման տարիներին»: 

«Para TV» -ի ղեկավար Էլիզաբեթ Պետրոսյանը. 
«Երկար տարիներ աշխատել ենք Արա Սաղաթելյանի հետ, ով փաստավավերագրական ֆիլիմի համար տրամադրել է տեղեկատվություն, որը շատ ծանր ինֆորմացիա է, որը գտնելու համար պահանջվում են տարիներ։...   

2016 թվականին տրվում էր ճշգրիտ տեղեկատվություն ՊՈԱԿ-ի կողմից, ի տարբերություն 2020 թվականի, երբ բոլոր լրատվամիջոցները խաբված էին:

Արծրուն Հովհաննիսյանը կարծում է, որ ինքը մեղավոր չէ և կարող է գնալ և գիտությամբ զբաղվել, ես կարծում եմ, որ նա պետք է գա և ասի, թե ինչու է ինքը սուտ խոսել, ոչ թե Արա Սաղաթելյանը պատասխան տա նրա համար, ինչը չի արել»։ 

«Արմենիա սպուտնիկ» լրատվականի ղեկավար Դմիտրի Պիսարենկոն. 
«Արա Սաղաթելյանը կարող էր ինձնից խնդրել գտնել «Նեզավիասիմայա Գազետա» թերթի բնօրինակ, որտեղ Ադրբեջանի նախկին նախագահ Այազ Մութալիբովը ինտերվյուի ժամանակ ընդգծել էր Խոջալուի հետ կապված դեպքերի շատ կարևորագույն փաստեր։ Եվ դրա համար պետք է այնքան խորացած լինել Ղարաբաղյան այդ պրոբելի նրբությունների մեջ, որ կարելի էր շատ տպավորիչ լրատվական պրոդուկտներ պատրաստել այն լսարանի համար, որը այնքան էլ պատկերացում չունի ինչ է կատարվել մեր տարածաշրջանում և Ղարաբաղում այն ժամանակ»։ 

«Para TV» -ի լրագրող Արման Սուլեյմանյանը. 
«Արիկ Սաղաթելյանի մասնագիտական հմտությունների, ունակությունների մասին խոսելիս նախ և առաջ շատ կարևոր եմ համարում, որպեսզի հեռուստադիտողը հասկանա, որ վերջին առնվազն 20 տարվա ընթացքում երբևիցե չի եղել ժամանակաշրջան, երբ Ադրբեջանի կամ Թուրքիայի դեմ աշխատող ինֆորմացիոն պատերազմի մարտիկները ընդհնարապես կասկածի տակ հայտնվեն: Այսինքն՝ նույնիսկ եթե տվյալ մարդկանց հայացքները այս կամ այն կերպ չեն համընկել օրվա իշխանության հետ, միևնուն է՝ նրանց մասնագիտական որակները և պետությանը ծառայելու պատրաստակամությունը երբեք կասկածի տակ չի դրվել»։

«Առավոտ» թերթի գկխավոր խմբագիր Արամ Աբարահամյանը.
«2016 թվականին, անկախ նրանից, թե ինչպես էր ռազմական գործողություններն ընթանում, տեղեկատվական պատերազմն ավելի շահեկան էր Հայաստանի համար և այդտեղ մեծ դեր էր կատարում այն կառույցը, որը ղեկավարում էր Արա Սաղաթելյանը: Մեծ նշանակություն ուներ նաև նրա լավ և ջերմ հարաբերությունները բոլոր լրատվամիջոցների հետ՝ անկախ նրանից, թե քաղաքական ինչ ուղղվածություն ունեին»:

Բոլորի ամբողջական խոսքը՝ դիտեք ֆիլմում։