Ձեր վստահելի աղբյուրը

«Նիկոլ Փաշինյանը իր կառավարման տարիներին միշտ պատրաստ է եղել երկիրը տանել մարտի 1-երի և հիմա էլ տանում է դրան»,-«Հայելի» մամուլի ակումբում հայտնեց ԵԿՄ նախկին անդամ Դավիթ Մկրտչյանը:

Ըստ ազատամարտիկի՝ Սերժ Սարգսյանը ճիշտ էր, երբ հանդիպման ժամանակ Նիկոլ Փաշինյանին ասաց, որ նա դասեր չի քաղել մարտի 1-ից: Նա նկատեց, որ ինչպես Եռաբլուր այցի  ժամանակ, այնպես էլ այսօր Նիկոլ Փաշինյանը կարող է հասարակությանը հասցնել նոր մարտի 1-ի՝  իր հանրահավաքի մասնակիցներին բերելով ընդդիմության հանրահավաքի վայր:

«Եթե Նիկոլ Փաշինյանը մնաց իշխանության, ապա մեծ այրունահեղություն կլինի և ես գտնում եմ, որ բանակը պետք է դուրս գա փողոց և վերցնի իշխանությունը ու դրանով կանխի մարտի 1-ի նման նոր արյունահեղությունը»,- հայտարարեց Դավիթ Մկրտչյանը:

Ազատամարտիկի կարծիքով, հասարակության գերակշիռ մասը հասկացել է, որ Փաշինյանը երկիրը կործանում է և կողմ են նրա հեռացմանը, բաց դուրս չեն գալի փողոց, այդ պատճառով էլ բանակը պետք է գործի, քանի դեռ չենք կորցրել նաև Երևանը:

Մկրտչյանը հայտնեց, որ երբ կարդացել է բանակի հայտարարությունը, հուզվել է և սպասում է, որ նույն հայտարարությունը կանեն ոստիկանությունը և ԱԱԾ-ն:

Նա չի կարող ասել, թե Նիկոլ Փաշինյանը Թուրքիայի գործակալն է, թե ոչ, բայց վերջինս անում է այն, ինչը կաներ նման գործակալը:

Մկրտչյանի կարծիքով՝ Նիկոլ Փաշինյանը Թուրքիայի և Ադրբեջանի համար արեց այն, ինչը չէր հաջողվել 90-ականներից հետո անել Թուրքիայի և Ադրբեջանի ոչ մի նախագահի:
 
«Եթե նա նամուս, թասիբով հայ է պետք է հրաժարական տա ու ասի՝ կրա՛ծ տղեք, դե եկեք Ալիևին կզցրեք, թող ինձ էլ չծաղրի»,- անդրադառնալով Փաշինյանի հասցեին Ալիևի վերջին ծաղրական հայտարարություններին՝ առաջարկեց ազատամարտիկը: 

Անդրադառնալով Ռոբերտ Քոչարյանի հրապարակ գալու հնարավորության մասին հարցին՝  ազտամարտիկն հայտարարեց, որ պայքարում է նախկինների վերադարձի համար,  և հարց ուղղեց հակառակ կարծիքը ունեցողներն. «Նախկինների այդ՝ շատ դեպքերում հորինած թալանը այդքա՞ն վիրավարական է, քան այսօրվա ստեղծված իրավիճա՞կը: Արցախը տվեց, երկիրը կործանեց, այն ինչ մնացել է, դա էլ մերը չէ, կարողանո՞ւմ ենք մի զինվոր տանենք Արցախ»:

Ըստ ազատամարտիկի, այսօր են թալանում Արցախին եկած օգնությունը: