Իսկ ո՞վ է ձեզ ասել, որ էսքանից հետո դուք ընդհանրապես իրավունք ունեք պայման դնելու.Արման Աբովյանը՝ «Իմ քայլին»

Քաղաքական 11:32 02/03/2021 Հայաստան

«Ժողովո՛ւրդ, ոնց որ Հայաստանն առանձին է ապրում՝ իր դարդերով, դուք լրիվ առաձին օրակարգեր եք փորձում գեներացնել»,- այսօր ԱԺ-ում հայտարարեց «Բարգավաճ Հայաստան» խմբակցության պատգամավոր Արման Աբովյանը:

Ըստ պատգամավորի՝ տպավորություն է ստեղծվում, որ խորհրդարանը լրիվ կտրված է իրականությունից և օրակարգում ընդգրկված 19 հարցերից միայն մեկ հարցն է առնչվում գերիներին, դրա փոխարե քննարկվում է գնումների մասին, հաշվեքննիչ պալատի մասին և նման այլ հարցեր:

«Դուք չե՞ք տեսնում, որ ձեր օրակարգը տանում է կատաստրոֆայի, բա ո՞նց ենք դուրս գալու էս վիճակից: Ասում եք՝ սրանք են մեր պայմանները ու բոլորն էս պայմաններով պետք է շարժվեն, իսկ ո՞վ է ձեզ ասել, որ էսքանից հետո դուք ընդհանրապես իրավունք ունեք պայման դնելու», - հայտարարեց պատգամավորը:

«Իմ քայլը» խմբակցության պատգամավոր Հայկ Կոնջորյանը ելույթ ունեցավ և մեղադրեց խորհրդարանական ընդդիմությանը, որ նրանք չեն մասնակցում գերիների խնդիրներին նվիրված քննարկումներին և չեն պատասխանում ադրբեջանական քարոզչությանը:

Արման Աբովյանի խոսքով՝ «Իմ քայլը» խմբակցությունում առնվազն երկու մարդ կա, ով շատ լավ տեղյակ է ադրբեջանական պրոպագանդայի դեմ իր կատարած գործունեության մասին:

«14 անգամ ասում եք՝ վեբինարի եք մասնակցել, կարո՞ղ է տեղյակ չեք, որ երկրում կրիզիս է, ծանրագույն քաղաքական կրիզիս: Եթե չգիտեք՝ տեղյակ պահեմ»,- հայտնեց պատգամավորը և շեշտեց, որ իրենք ադրբեջանցիներին ուղղված հայտարարություններ իշխանական պատգամավորներից շատ ու ավելի ուժեղ են ասում:

Նա հայտնեց, որ հետաքրքրվողներին կարող է ներկայացնել ԲՀԿ խմբակցության պատգամավորների կատարած քրտնաջան աշխատանքը գերիների մասով:

«Սկսած նամակներից, ոչ թե վեբինարներից, այլ նամակներից մինչև դիմումներ: Չհամարձակվե՛ք այդ հարցը այստեղ շահարկել»,-շեշտեց Արման Աբովյանը:

Հարակից հրապարակումներ`

Տեքստում սխալ կամ վրիպակ նկատելու դեպքում, ուղարկեք խմբագրին հաղորդագրություն` նշելով տվյալ սխալը, այնուհետև սեղմելով Ctrl-Enter: