Ձեր վստահելի աղբյուրը

«Մենք խոսել էինք այն մասին, որ դատարան դիմելու համար պետական տուրքի հետ կապված որոշակի փոփոխություններ կատարվեն, բայց էլի լուծումները հակառակ կողմից են գալիս»,- այսօր խորհրդարանում ասաց ԱԺ «Լուսավոր Հայաստան» խմբակցության պատգամավոր Տարոն Սիմոնյանը՝ անդրադառնալով դատարան դիմելու համար պետական տուրքի նվազագույն վճարի բարձրացմանը:

Նրա խոսքով, փորձ է արվում պետական տուրքը ավելացնելով՝ իջեցնել դատարան դիմող քաղաքացիների քանակը, կամ ինչ-որ տեղ դատարանի ծառայությունների փոխհատուցման հարցը լուծել, ինչն, ըստ պատգամավորի, սխալ ճանապարհ է։

«Սա ոչ միայն տեխնիկական մակարդակով է սխալ, այլ նաև իրավական մակարդակով, քանի որ առաջացնում է հակասահմանադրականության խնդիր»,- նկատեց պատգաավորը։

Ըստ Տարոն Սիմոնյանի, ստորին շեմի բարձրացումն անընդունելի է:

«Եթե հանկարծ այս չարաբաստիկ նախագիծն ընդունվի, Մարդու իրավունքների եվրոպական դատարանում ունենալու ենք խնդիրներ հենց դատարանի մատչելիության իրավունքի խախտման հետ կապված, սրա մասին պետք է մտածեք: Փոփոխություններ կատարեք հենց այդ տրամաբանությամբ, որ հանկարծ մատչելիության իրավունքը մենք չոտնահարենք»,- զգուշացրեց նա։

Հիշեցնենք, որ ըստ օրենքի նախագծի,  նվազագույն տուրքը սահմանվում է 6 հազր դրամը, որը սպառողական զամբյուղի 9 տոկոսն է, սական այն, ըստ գորիծի ծավալի, կարող է հասնել մինչև 25 մլն դրամի։