Ձեր վստահելի աղբյուրը

ԱԺ աշխատակազմի նախկին ղեկավար Արա Սաղաթելյանին կալանավորելու մասին Երևանի ընդհանուր իրավասության դատարանի որոշման դեմ բողոքն արդեն հասել է վերաքննիչ դատարան, մուտք է եղել, երեկոյան կմակագրվի կոնկրետ դատավորի: Panorama.am-ին տեղեկացրեց Ա. Սաղաթելյանի պաշտպան Հակոբ Ենոքյանը:

«Երեկ տեսակցել եմ պարոն Սաղաթելյանին: Մարտական է տրամադրված, մեղքը չի ընդունում, ընդունելու բան էլ չկա, մինչև վերաքննիչ դատարանով արդարությունը վերականգնենք: Մեծ հույս ունենք վերաքննիչ դատարանից»,- ասաց փաստաբանը: 

Հ. Ենոքյանը հայտնեց, որ վերացվել է ընտանիքի անդամների, մասնավորապես կնոջ ու որդու՝ տեսակցելու սահմանափակումը:

«Միջնորդել էի, այդ սահմանափակումը քննիչը վերացրել է»,- ասաց նա:

Ավելի վաղ փաստաբանն ասել էր, որ ԱԱԾ քննչական դեպարտամենտի պարագայում ընդունված պրակտիկա է, որ կալանավորված անձանց հետ կապված ընտրում են կանխարգելիչ միջոց, որ անձը չհաղորդակցվի այլ անձանց հետ, բայց պարոն Սաղաթելյանի մասով արգելքը նաև վերաբերում էր ընտանիքի անդամներին, մասնավորապես, կնոջն ու 10-ամյա որդուն:

«Պատճառ չէր նշվել, ընդհանուր գրված էր քննչական գործողություններն ապահովելու անհրաժեշտության համար, սակայն տարանջատած չէր, թե ինչու հենց կնոջ ու երեխայի հանդեպ էլ պետք է կիրառվեր: Միջնորդություն ներկայացրեցի այդ մասով ու սահմանափակումը հանվեց»,- ասաց Հակոբ Ենոքյանը:

Հիշեցնենք, որ փետրվարի 21-ին Երևանի ընդհանուր իրավասության դատարանը, դատավոր Արմինե Մելիքսեթյանի նախագահությամբ, որոշում է կայացրել երկու ամսով կալանավորել Արա Սաղաթելյանին՝ բավարարելով քննիչի միջնորդությունը:

Արա Սաղաթելյանին մեղադրում են ՀՀ ՔՕ 226 (ազգային, ռասայական կամ կրոնական թշնամանք հարուցելը), 226.2 (բռնություն գործադրելու հրապարակային կոչերը, բռնությունը հրապարակայինորեն արդարացնելը կամ քարոզելը), 307.4 (ռազմական դրության իրավական ռեժիմի ընթացքում տեղեկությունների հրապարակման կամ տարածման կանոնները խախտելը) հոդվածների հատկանիշներով: