Խնդրում եմ անկարողությունը թավիշ չհամարել. Սոֆյա Հովսեփյան

Քաղաքական 18:18 02/03/2021 Հայաստան

Խնդրում եմ անկարողությունը թավիշ չհամարել. Սոֆյա Հովսեփյան

«Որքա՞ն կարելի է մերժել Սերժին։ 2018-ին մերժեցինք, ու հիմա՝ 2021-ին հլը մերժում ենք»,- այսօր խորհրդարանական հայտարարության ժամին ասաց անկախ պատգամավոր Սոֆյա Հովսեփյանը։

Նա հարց բարձրացրեց, թե որքան դեռ պետք է իշխանությունը չհասկանա, որ արդեն մերժել է, և դրանից հետո ունի իշխանություն։

«Հիմա հնարավորություն է ստեղծվել, և կողքից եմ նայում՝ երկրում կա ընդդիմություն և էլի ընդդիմություն, իշխանություն գոյություն չունի, մեկը մյուսին մերժում է: Այն որ ընդդիմությունը քննադատում է, դա նորմալ է, բնականոն է, բայց որ իշխանությունն է այդքան քննադատում, չեմ հասկանում, քանի որ այդ էներգիան, որ դնում է քննադատելու համար, պետք է լիներ աշխատանք և գործ»,- նշեց նա:

Սոֆյա Հովսեփյանն ասաց՝ գոյություն ունեն մարդկանց խմբեր, որ ո՛չ այս կողմի վրա են, ո՛չ այն կողմի վրա են, և հարց բարձրացրեց, թե ինչ է, ՀՀ քաղաքացիներ չեն և պետք է նստեն ու ամեն օր նայեն, թե ինչպես են իրար ինչ ասես ասո՞ւմ:

«Ողջախոհության քայլերը առաջին հերթին պետք է անի իշխանությունը՝ համախմբելով մարդկանց, չպառակտելով: Այսօր մեր ազգը պառակտված է, մարդիկ իրար ատում են, ընտանիքներ են բաժանվում, ընտանիքի մի մասը Բաղրամյան պողոտայում է, մյուս մասը Հանրապետության հրապարակում»,- ասաց նա։

Պատգամավորը կոչ արեց համախմբվել, քանի որ Հայաստանը ազգակործանման ճանապարհին է։

«Մենք խնդրի առաջ ենք կանգնելու և այդ խնդրի միակ լուծումը իշխանության կողմից համախմբման փորձ անելու մեջ է և ոչ թե աջ ու ձախ դավաճաններ չփնտրելու մեջ»,- նկատեց նա։

Պատգամավորը հարց հնչեցրեց՝ եթե դավաճաններ կան, ո՞ւր է այդ դեպքում օրենքը, ո՞ւր է համապատասխան պատիժը:

«Եթե չենք կարող, ուրեմն խնդրում եմ անընդհատ չասել՝ վերջ թավիշին: Խնդրում եմ անկարողությունը թավիշ չհամարել»,- եզրափակեց խոսքը նա:

Հարակից հրապարակումներ`

Տեքստում սխալ կամ վրիպակ նկատելու դեպքում, ուղարկեք խմբագրին հաղորդագրություն` նշելով տվյալ սխալը, այնուհետև սեղմելով Ctrl-Enter: