«Ժողովուրդ». Պարտքեր կուտակած, ԱՄՆ-ում տաքսի վարած Կենտրոնի թաղապետը մարել է պարտքերը

ԱՅԼՄԱՄՈՒԼ 09:32 02/03/2021 Հայաստան

«Ժողովուրդ» օրաթերթը գրում է. «Կենտրոն վարչական շրջանի ղեկավար Ավետ Պողոսյանի կենսագրականից որոշ մանրամասներ են ի հայտ եկել. նախկինում պարտքերով ապրողը այսօր ոչ միայն պարտքերն է վերադարձնում:
«Ժողովուրդ» օրաթերթը տեղեկություններ ստացավ այն մասին, որ 2008 թվականին, երբ որպես քաղհալածյալ Պողոսյանը Հայաստանից փախել է և հաստատվել Ամերիկայի Միացյալ Նահանգներում, մինչ այդ հասցրել է Հայաստանում պարտքեր կուտակել։ Նույն լուրերի համաձայն՝ դեռ այն ժամանակ Պողոսյանը պարտքով գումար է վերցրել կնոջ բարեկամներից, հարևաններից, ընկերներից և հետ չի վերադարձրել: Իսկ ԱՄՆ-ում, ըստ ականատեսների, Պողոսյանը տաքսի է վարել։ Հիմա նա, Հայաստանում Կենտրոն վարչական շրջանի ղեկավարի պաշտոնը զբաղեցնելով և ամսական մոտ 400 հազար դրամ ստանալով, սկսել է պարտքերը մարել և ոչ միայն:

Մեր ստացած այս տեղեկությունների ստուգման հետքերով «Ժողովուրդ» օրաթերթը երեկ գնաց Կենտրոն վարչական շրջանի շենք՝ անձամբ զրուցելու թաղապետի հետ և պարզելու իր մասին մեր ստացած լուրերի իսկությունը։ Սակայն Ավետ Պողոսյանը մեզ համար ժամանակ չգտավ և գործավարուհու միջոցով փոխանցեց, թե չի ուզում խոսել։ Այսպիսով, մենք ոչ միայն չկարողացանք ստանալ թաղապետի պարտքերին վերաբերող տեղեկությունների պատասխանները, լսել իսկությունը, այլև նրա տեսլականը չիմացանք՝ որպես տաքսու նախկին վարորդի, ոլորտի պրոֆեսիոնալի, թե ինքն ինչ ծրագրեր ունի Փոքր կենտրոնի տաքսու վարորդների համար, ինչ նորարարություններ է մտածել գերծանրաբեռնված Կենտրոնի համար նախկին տաքսու վարորդը։

Ի դեպ, Ավետ Պողոսյանի մորաքրոջ որդին Երևանի քաղաքապետի աշխատակազմի քարտուղարի ԺՊ Դավիթ Համբարյանն է. բարեկամներով տեղավորվել են չկոռումպացված քաղաքապետարանում»։

Մանրամասները թերթի այսօրվա համարում:

Տեքստում սխալ կամ վրիպակ նկատելու դեպքում, ուղարկեք խմբագրին հաղորդագրություն` նշելով տվյալ սխալը, այնուհետև սեղմելով Ctrl-Enter: