Ձեր վստահելի աղբյուրը

Կառավարության այսօրվա նիստի օրակարգում ընդգրկված 49 հարցից զեկուցվող է միայն 4-ը և մեկ հարց կդիտարկվի գաղտնի ընթացակարգով:

Չզեկուցվող հարցերի մեջ է «Հավաքական անվտանգության մասին պայմանագրի կազմակերպության խաղաղապահ գործունեության մասին» 2007 թվականի հոկտեմբերի 6-ի համաձայնագրում փոփոխություններ կատարելու մասին» արձանագրության ստորագրման առաջարկությանը հավանություն տալու մասին հարցը: Առաջարկվող փոփոխությամբ նախատեսվում է սահմանել ՀԱՊԿ խաղաղապահ ուժերի ՄԱԿ խաղաղապահ գործողություններում կիրառվելու հնարավորությունը, այդ նպատակով ՀԱՊԿ հավաքական խաղաղապահ ուժերի՝ համակարգող պետության հովանու ներքո ստեղծումը, ինչպես նաև Հավաքական խաղաղապահ ուժերի՝ ՄԱԿ խաղաղապահ գործողությանը մասնակցության պայմանների՝ Համակարգող պետության և ՄԱԿ լիազոր ստորաբաժանման միջև կնքված համաձայնագրով նախատեսումը:

Նիստի օրակարգում ընդգրկված է նաև «Հավաքական անվտանգության մասին պայմանագրի կազմակերպության Զորքերի նյութատեխնիկական և բժշկական համատեղ ապահովման մասին» համաձայնագրի ստորագրման առաջարկությանը հավանություն տալու մասին հարցը:

Գործադիրը նախատեսում է երկարացնել Զարգացման ասիական բանկի հետ 2016թ-ի նոյեմբերի 9-ին կնքած վարկային պայմանագիրը: Վարկի գումարն 44 մլն եվրո է։

Ծրագրի ակնկալվող ավարտը 2020թ․ նոյեմբերի 30-ն է, որի նպատակն է հիմնանորոգել Մ6, Վանաձոր-Ալավերդի-Վրաստանի սահման միջպետական նշանակության ավտոճանապարհի Քոբայր-Բագրատաշենի սահմանային անցակետ կմ 38+450-կմ 90+191  հատվածը (երկարությունը՝ 51․74կմ): Կառավարությունը որոշելու է վարկային համաձայնագիրը երկարաձգել մինչև 2022թ. դեկտեմբերի 31-ը (շինարարական աշխատանքների ավարտ՝ 2021թ. օգոստոսի 31, թերությունների համար պատասխանատվության ժամկետի ավարտ՝ 2022թ. օգոստոսի 31 և 4 ամիս՝ ծրագրի ֆինանսական աուդիտի իրականացման և կանխավճարային հաշվին առկա կանխավճարների լրիվ մարման համար)։

Գործադիրը հավանության կտա «Եվրասիական տնտեսական միության շրջանակներում վարկային պատմությունների կազմում ներառվող տեղեկությունների փոխանակման կարգի մասին» համաձայնագիրը կնքելու նպատակահարմարության մասին նախագծին:

Մեկ այլ նախագծով ՀՀ արդարադատության նախարարությունը դիմել է ՀՀ տարածքային կառավարման և ենթակառուցվածքների նախարարության Պետական գույքի կառավարման կոմիտե՝ նոր ստեղծվող Հակակոռուպցիոն կոմիտեի ժամանակավոր տեղակայման նպատակով ՀՀ ոստիկանությանը պատկանող ՀՀ Երևան քաղաքի Մոսկովյան 1 հասցեում գտնվող անշարժ գույքը նախարարությանն ամրացնելու խնդրանքով: ՀՀ կառավարության 2020 թվականի հունիսի 11-ի թիվ 940-Ա որոշմամբ մրցույթային եղանակով օտարման ներկայացված ՀՀ Երևան քաղաքի Մոսկովյան 1 հասցեում գտնվող անշարժ գույքը չի օտարվել: Նախագծով  առաջարկվում է պետական սեփականություն հանդիսացող Երևան քաղաքի Մոսկովյան 1 հասցեում գտնվող 1934.8  քառ. մետր մակերեսով վարչական շենքը և դրա օգտագործման ու սպասարկման համար հատկացված 0.067667 հեկտար հողամասը հետ վերցնել ՀՀ ոստիկանությունից և ամրացնել Հայաստանի Հանրապետության արդարադատության նախարարությանը: