Ձեր վստահելի աղբյուրը

«Նիկոլ Փաշինյանը հանդիպում ունենալու է նաև ԲՀԿ առաջնորդի հետ, հրավերն արդեն գնացել է»,- այսօր խոհրդարանում լրագրողների հետ զրույցում ասաց ԱԺ «Իմ քայլը» խմբակցության ղեկավար Լիլիթ Մակունցը։

Նրա խոսքով, պետք է սպասել հանդիպումներին և բանակցություններին, թեև դեռ հստակ չէ՝ Ծառուկյանի հետ հանդիպումը կկայանա՞, թե՞՝ ոչ։

Հարցին, թե ինչպես է ինքը վերաբերում ԱԺ-ում դիպուկահարների տեղակայմանը, Լիլիթ Մակունցն արձագանքեց՝ ասելով, որ նախօրեին ոստիկանությունը հրապարակել էր սադրանքների հետ կապված տեղեկատվություն, և դիպուկահարների առկայությունը դրանով էր պայմանավորված։

«Անվտանգության հետ կապված որոշումների ընդունումը մեր դաշտում չէ, և իրավապահներն իրենք են միջոցառումներ ձեռնարկում»,- ասաց նա։

Լրագրողները հիշեցրին, որ ՄԻՊ-ը դատապարտել է դիպուկահարների միջոցով ուժի ցուցադրումը, ինչին ի պատասխան պատգամավորը նշեց, որ ամենայն հարգանք է տածում Արման Թաթոյանի հայտարարությանը։