Ձեր վստահելի աղբյուրը

«Պատկերացնո՞ւմ եք՝ ինչ ռեսուրս է ծախսվում. օրենսդիրը հանրային ուշադրությունը կենտրոնացնում է մի հարցի վրա՝ Վճռաբեկ դատարանի դատավորի ընտրություն, ու վերջում ոչ ոք չի ընտրվում»,- այսօր խորհրդարանական ճեպազրույցի ընթացքում ասաց ԱԺ «Լուսավոր Հայաստան» խմբակցության ղեկավար Էդմոն Մարուքյանն՝ անդրադառնալով իշխանության կողմից Վճռաբեկ դատարանի դատավորի ընտրության տապալմանը։

Նրա խոսքով, եթե անգամ քաղաքական մեծամասնությունը խնդիր ունի ԲԴԽ նախագահ Ռուբեն Վարդազարյանի հետ, անհասկանալի է՝ ինչու չեն ընտրվում դատավորներ, որոնք այդ ամենի հետ ընդհանրապես կապ չունեն։

Պատգամավորի գնահատմամբ՝ իշխանության վարքագիծը աբսուրդ է, ռեսուրսի, շանսերի վատնում, այն էլ այնպիսի երկրում, որն, իր խոսքով, որևէ բան վատնելու իրավունք չունի։

«Ինչ վերաբերում է ԲԴԽ նախագահին. Ռուբեն Վարդազարյանը երբեք էլ իմ հերոսը չի եղել, բայց ինչ է դուրս գալիս, որ իշխանությունները, երբ ուզում էին, որ նա լինի ԲԴԽ նախագահ, երևի մտածում էին, որ այդ մարդը պետք է իրենց հրահանգները կատարի, և հիմա բողոքի ձայն են հնչեցնում, որ այդ հրահանգները չեն կատարվում։ Հիմա ինչ է դուրս գալիս. մենք ասում ենք, որ ուզում ենք արդար դատական համակարգ, իսկ մյուս կողմից, ուզում ենք կամակատար դատական համակարգ, որից իշխանությունը գոհ կլինի»,- նշեց պատգամավորը։

Էդմոն Մարուքյանը հայտնեց, որ ամբողջ աշխարհում կա մի հետաքրքիր ինդիկատոր, եթե գործադիրն ու իշխանությունը քննադատում են դատական իշխանությանը, ուրեմն վերջինս լավ է աշխատել։

«Իշխանությունն իր պահվածքով ուղերձ տվեց միջազգային կառույցներին, որ այս համակարգը լավ է աշխատում»,- կարծիք հայտնեց Էդմոն Մարուքյանը։

Հարցին, թե ինքն ինչպես է վերաբերում ԲԴԽ նախագահի՝ նոյեմբերի 15-ի հայտարարությանը, ըստ որի՝ դատավորները պետք է ցույց տան՝ իրենք «վնգստացո՞ղ» դատավորներ են, թե՞՝ հայրենիքին նվիրված պրոֆեսիոնալներ, ԼՀԿ ղեկավարը պատասխանեց՝ ասելով, որ իշխանությունների հայտարարությունը, թե Ռուբեն Վարդազարյանի և Արթուր Վանեցյանի միջև կապ են տեսնում, «եփած հավի ծիծաղն է առաջացնում»։

«Ի՞նչ կապ տեսնել, եթե այդ մարդիկ 600 անգամ հրապարակային հայտարարել են, որ ընկերներ են։ Ավելին, երբ Ռուբեն Վարդազարյանը ԲԴԽ նախագահ էր ընտրվում, իրենք այդ մասին գիտեին...։ Ասում են, իբր դատավորները նախկին իշխանություններից կարող է հրահանգ ստացած լինեն, փաստեր կա՞ն։ Էս երկիրը դարձել է օդում խոսելու վայր։ Հո ասելով չի։ Կա՞ փաստ, թող գնան բռնեն, չկա՞՝ էլ ինչ են ասում»,- նշեց նա։

Ինչ վեաբերում է ԲԴԽ նախագահի հայտարարությանը, ապա Էդմոն Մարուքյանը հարցադրում արեց՝ իշխանական ո՞ր պատգամավորն է դատապարտել Փաշինյանի «վնգստացող դատավորներ» արտահայությունը։

«Չեն դատապարտել, այդ նույն հայտարարությունը ԲԴԽ նախագահը շրջել է իրենց դեմ։ Ինքը հղում է արել Փաշինյանի հայտարարությանը։ Հարցը գիտե՞ք որն է, երբ իրենց ղեկավարն է արել այդ հայտարարությունը, նորմալ է, երբ ԲԴԽ նախագահն է արել, դա դատապարտելի է։ Երկակի ստանդարտներ են»,- նկատեց նա։