Ձեր վստահելի աղբյուրը

«Հայաստանում  կատարվել է  տոտալ անօրինականություն, մարդկանց քմահաճույքների պատճառով  Արա Սաղաթելյանը 20 հազար րոպեից ավելի, այսինք 14 օր գտնվել է  անազատության մեջ»,- լրագրողներին ասաց ԱԺ աշխատակազմի նախկին ղեկավար Արա Սաղաթելյանի պաշտպան Միհրան Պողոսյանը:

Հիշեցնենք, որ Վերքաննիչ քրեական դատարանը բավարարել է  Արա Սաղաթելյանի կալանքի որոշման դեմ փաստաբանների բողոքն ու այժմ Արա Սաղաթելյանն արդեն ազատության մեջ է:

Մ. Պողոսյանը նշեց, որ սա որպես հաղթանակ չի դիտարկում, դիտարկում է որպես պայքարի սկիզբ, որովհետև միանգամայն հանցագործության հետ որևէ կապ չունեցող անձին  իր բնական միջավայրից հանել են ու պահել լրիվ անօրինական կարգով քրեակատարողական  հիմնարկում:

«Վերաքննիչ քրեական դատարանն արձանագրել է, որ Արա Սաղաթելյանին առաջադրված մեղադրանքի որևէ հոդվածով հիմնավոր կասկած առկա չէ: Դա նշանակում է, որ պարոն Սաղաթելյանը լրիվ անօրինական հիմքերով գտնվել է անազատության մեջ:

Մենք հաղթանակ կգնահատենք այս  գործով միայն այն պարագայում, երբ տոտալ անօրինականությունների հետ առնչություն ունեցող բոլոր պաշտոնատար անձիք՝ կլինի դատարանի նախագահ, պատվեր կատարող դատավոր, դատարանի նախագահին  պատվեր տվող այլ պաշտոնատար անձ, կհայտնվեն այս անգամ լրիվ օրինական հիմքերով քրեակատարողական հիմնարկի ներսում և կխորհեն այն հանգամանքի մասին, թե ինչպես է ստացվում, որ անձին որևէ հանցագործության հետ առնչություն չունենալու պարագայում ուղղակի հրահանգով ստիպում են, որ հայտնվի քրեակատարողական հիմնարկում»,- ասաց Արա Սաղաթելյանի պաշտպանը:

Մ. Պողոսյանի խոսքով, այդպիսի դատավորներն են, որոնք թույլ են տալիս գործող իշխանությանն այնպիսի վայրահաչումներ իրականացնել Բարձրագույն դատական խորհրդի նախագահի հասցեին ԱԺ-ում ու հենց այդ  պատճառով է, որ իշխանությունը, ցանկանալով այդպիսի զանգվող և զանգող դատավորներ ունենալ, փորձում է ԲԴԽ նախագահին իր զբաղեցրած պաշտոնից հեռացնել:

Պաշտպանը նշեց, որ չի կարող ասել մեղադրողը կբողոքարկի, թե ոչ, սակայն  Առաջին ատյանի դատարանն արձանագրել էր հիմնավոր կասկածի մեկ հոդվածի բացակայություն, այդ մասով մեղադրողը վերաքննիչ բողոք չէր ներկայացրել: Այսինքն մի մասով արդեն վերաքննիչ բողոք ներկայացնելու հնարավորությունից զրկված է մեղադրողը:

«Մենք այս գործով ունեինք 4 ձերբակալված անձ, 4-ի վերաբերյալ էլ վարույթ իրականացնող մարմինը  կալանավորումը որպես խափանման միջոց կիրառելու միջնորդություն էր ներկայացրել: Երկուսինը մերժվել էր, երկուսինը բավարարվել: Արա Սաղաթելյանի դեպքում էլ արձանագրվեց հիմնավոր կասկածի տոտալ բացակայությունը:
Այսինքն, մենք կարող ենք առնվազն ենթադրության մակարդակով էլ հետևության հանգել, որ այդ անձը, ով այս պահին գտվում է քրեակատարողական հիմնարկում, իր նկատմամբ կալանավորումը խափանման միջոց կիրառվել է  միայն ճնշումների, զանգերի միջոցով այդ անձին ՔԿՀ-ում տեսնելու ցանկությունից դրդված:

Այս ամեն ինչի պատասխանատուները պետք է իրենց պատիժը կրեն, որ Հայաստանում այսուհետ որևէ մեկի մտքով չանցնի, որ կարելի է անմեղ անձին գոնե մեկ րոպեով, գոնե մի քանի ժամով ազատությունից զրկեն»,- ասաց փաստաբանը:

Նա նշեց, որ այս գործում «այլ անձանց» առկայությունն ի հայտ եկավ ձերբակալման գիշերը.  «4 անձին  ձերբակալելուց հետո  հայտնի օգտատերը շարունակեց իր գրառումները: Մինչ այդ  կասկածանքի էության մեջ այլ անձանց մասին որևէ տեղեկություն չկար:

ԱԱԾ-ն ամբողջ գիշեր մտածելով, թե ինչպես կարելի է վերագրել այդ օգտատիրոջ հաջորդ գրառումները, ավելացրեցին, թե իբր այս  քրեական գործում բացի այս 4 անձանցից ներկայացված են նաև այլ անձիք,  փորձել էին իրավական միտք տալ այս ամեն ինչին, ինչն  իրականությանը չի համապատասխանում:

Իսկ ինչ վերաբերում է  անձանց փոխկապակցված լինելուն՝ նշել էին գործընկեր Կարեն Բեքարյանը: Պարզեցինք, որ պարոն Սաղաթելյանն ու Կարեն Բեքարյանը երբևէ գործընկերներ չէին եղել: Գրված էր վարորդ Մհեր..., Մհերը երբևէ պարոն Սաղաթելյանի վարորդը չի հանդիսացել: Նշում էին նաև՝ Արամ Սարգսյանը: Արամ Սարգսյանի հետ կապված  որևէ հիմք չկա, քանի որ պարոն Սաղաթելյանն էլ էր նշել, որ չի ճանաչում Արամ Սարգսյան անունով  անձնավորությանը, ում մեղասագրվում է: Վարույթ իրականացնող մարմինն էլ, որևէ կապ  չգտնելով, չէր նշել, թե ինչ կապի մեջ են գտնվում: 

Աբսուրդ է: Այսինքն «այլ անձիք» ավելացվել է ուղղակի մեկ դիտավորությամբ՝ իրենց անկարողությունը կոծկելու համար, քանի որ այդ օգտատերը շարունակում էր հաղորդագրություններ տարածել, չէին կարողանում իրականում բացահայտել, թե ով է այդ  հաղորդագրությունները տարածում, օգտագործել են այլ անձիք տերմինը,  որպեսզի իրենց անկարողությունը  քողարկեն դրանով»:

Մ. Պողոսյանի ընդգծեց՝ աբսուրդի գագաթնակետում է գտնվում այս քրեական գործը, առաջադրված մեղադրանքը:

Պաշտպանն ասաց, որ Վերաքննիչ քրեական դատարանի դատավոր Արշակ Վարդանյանը չի հանդիսանում զանգող կամ զանգվող դատավորներից մեկը:

«Մենք պարոն Վարդանյանի մոտ ունեցել ենք և քրեական գործեր՝ ոչ բարենպաստ ելքով, նաև բարենպաստ ելքով, որևէ անգամ այդ հարաբերությունները իրավաբանական մակարդակից դուրս չեն եկել:
Պարոն Վարդանյանը օրենքի, ներքին համոզման հիման վրա կայացրել է  դատական ակտ, ինչի ակնկալիքն ունեի նաև մինչև դատական նիստը, նշում էի, որ ես Վերաքննիչ դատարանից  սպասում եմ այն, ինչ սպասում եմ Հայաստանի յուրաքանչյուր դատարանից՝ օրինական, օբյեկտիվ,  ներքին համոզման հիման վրա  կայացված դատական ակտ: Կարծում եմ՝ որևէ մեկը խելքը հացի հետ չի կերել, որպեսզի Հայաստանի լավագույն դատավորներից մեկի նկատմամբ որևէ ոտնձգություն սկսի»,- ասաց Միհրան Պողոսյանը:

Հիշեցնենք, որ փետրվարի 21-ին Երևանի ընդհանուր իրավասության դատարանը, դատավոր Արմինե Մելիքսեթյանի նախագահությամբ, որոշում էր կայացրել երկու ամսով կալանավորել Արա Սաղաթելյանին՝ բավարարելով քննիչի միջնորդությունը:
Արա Սաղաթելյանին մեղադրում էին ՀՀ ՔՕ 226 (ազգային, ռասայական կամ կրոնական թշնամանք հարուցելը), 226.2 (բռնություն գործադրելու հրապարակային կոչերը, բռնությունը հրապարակայինորեն արդարացնելը կամ քարոզելը), 307.4 (ռազմական դրության իրավական ռեժիմի ընթացքում տեղեկությունների հրապարակման կամ տարածման կանոնները խախտելը) հոդվածների հատկանիշներով: