Ձեր վստահելի աղբյուրը

Վերաքննիչ քրեական դատարանի որոշմամբ կալանքից ազատ արձակված ԱԺ աշխատակազմի նախկին ղեկավար Արա Սաղաթելյանից լրագրողները հետաքրքրվեցին՝ շարունակե՞լու է զբաղվել հակաադրբեջանական գործունեութամբ, թե՞ այս գործընթացը կխանգարի նրան։

«Ինձ այն որևէ կերպ չի կարող խանգարել, որովհետև այս գործընթացը գոյություն չունի»,-ի պատասխան ասաց նա։

Սաղաթելյանը գործը որակեց որպես փնթի ու անհիմն, այնքան փնթի, որ գրասենյակի խուզարկության որոշման մեջ գրված է եղել, որ ինքը «Արմենպրես» գործակալության տնօրենն է։

«Հենց այդ տրամաբանության մեջ էին բոլոր փաստաթղթերը։ Երբ դեռ նստած չէի, Արմենպրեսի տնօրենը Արամ Անանյանն էր։ Եկան առգրավեցին, ինչ հնարավոր էր, եթե շունն էլ ունենայինք, շանն էլ կառգրավվեին, արգելեցին փաստաբան կանչել։  Ես վստահ եմ, որ դա մի հոգու մտասևեռվածության, ոչ նորմալ մտածելակերպի արդյունք է։ Այն մակուլատուրան, որ դրված էր քրեական գործի հիմքում, չի գրվել ԱԱԾ-ում։ ԱԱԾ-ն գտնվում էր աննախադեպ քաղաքական ճնշման տակ, աննորմալ ճնշման տակ։ Գալիս են օֆիս խուզարկելու, որտեղ գտնվում եմ ես, գալիս են յոթ հոգի Ալֆայից, երկու քննիչ, մի օպեր։ Բանդա՞ էին այնտեղ վերցնում...Յոթ հոգի Ալֆայից էր։ Ալֆան գալիս է՝ ի՞նչ անի։ Ինձ տանում էին երրորդ հարկով, կզած վիճակում՝ ձեռքերս մեջքի հետևում, ո՞ւր էի փախնելու ես ԱԱԾ-ի երրորդ հարկից։ Ես պատկերացնում եմ, ոնց են նույն ԱԱԾ-ի պարկեշտ սպաներն ու նույն Ալֆայի տղաները զզվում Նիկոլ Փաշինյանից։ Երևի էդ վիդեոն նկարել են, ուղարկել են Նիկոլին, որ նայի, հանգստանա, հետո էլ հեռախոսը լպստի ու քնի»,-ասաց նա։

Սաղաթելյանն ասաց, որ իր բարի համբավը արատավորելու գործընթացի դեմ պաշտպանությունն արդեն սկսել է ՝ հայց ներկայացնելով ոմն Տարոն Չախոյանի դեմ, որն այժմ  նշանակվել է պետական բարձր պաշտոնի։

«Ինձ վարկաբեկելու նպատակով տարածել էր տեսանյութ, իբր ես կառավարում եմ ինչ-որ ֆեյքի։ Իմ փաստաբանների միջոցով տվյալ անձի դեմ մենք դիմեցեինք ԱԱԾ և քաղհայցով դատարան։ Բոլորը, ովքեր մասնակցել են այս գործընթացին, պետք է ենթարկվեն պատասխանատվության։ Սա միակ գործը չէ, որ փորձում են ինձ լռեցնել։ Բոլորն էլ քաղաքական են։ Հարցաքննությունների ժամանակ շփվելով քննիչների հետ, ես լսում եմ ապուշ հիմնավորումներ, մենք ծառայող մարդիկ ենք, և եթե ես չանեմ, մեկ ուրիշը կանի»։ Եթե ծառայող մարդիկ եք, պետք է ծառայեք Հայաստանի Հանրապետությանը, օրենքին ու իրավունքին, եթե այն, ինչ անում եք, չի համընկնում ձեր պատկերացումներին, ձեր ուսադիրներին, ապա պետք է հրաժարական տաք։ Ինձ մոտ եղել է նման բան, երբ ես արդարադատության նախարարի խորհրդական էի, երբ տեսել եմ, որ սխալներ եմ գործում,  հրաժարական եմ տվել ու շարունակել եմ հարգանք վայելել։ Հաջորդ հարցով, եթե ես չանեմ ուրիշը կանի, կներեք, որ այսքան պարզեցնում եմ, բայց եթե քեզ ուղարկում են սիգարետի ու դու գնում ես, ուրեմն անընդհատ կուղարկեն։ Մի օր դու պետք է չանես, մյուսը պետք է չանի, որ ԱԱԾ-ից պոլի շոր չսարքեն։ Այսօր ԱԱԾ-ից սարքել են իշխանության քիլլերը», -մանրամասնեց Սաղաթելյանը։

Ի դեպ, նա հայտարարեց, որ նույն գործով կալանավորված Արամ Սարգսյանին չի ճանաչում, ընդամնեը երկու Արամ Սարգսյանի գիտի՝ Արամ Գասպարի Սարգսյանը, Արամ Զավենի Գասպարյանը։ Կալանավորվածը նրանցից որևէ մեկը չէ։

Սաղաթելյանն ասաց, կյանքում Գագիկ Սողոմոնյանի գրառումները կարդացել է չորս անգամ։

«Դատարանում ես իմացա, որ Գագիկ Սողոմոնյանը ստեղծվել է 2018-ի հունիսին, ես VPN եմ գնել պատերազմից առաջ՝ վճարելով իմ քարտով։ Մեղադրականի սկիզբը, որ կարդաք, թվում է, բարձր պետական պարգևի էին արժանացնում, ճոխ բառեր էին գրած, հետո եկավ ապուշությունների շարանը։ Ես չգիտեմ, ով է Գագիկ Սողոմոնյանը։ Հնարավոր է՝ իրենցից մեկն է, ինչը հին մոտեցում է»,-ասաց Սաղաթելյանը։

Նա օրինակ, չբացառեց, որ դա արել է իր կողմից նախկինում ղեկավարված ՊՈԱԿ-ը, որը եղել է տեղեկատվական անվտանգությունը սպասարկող լրջագույն կառույց, ունեցել է  273 մլն դրամ բյուջե, իսկ այսօր վերածվել է ֆեյքերի ՊՈԱԿ-ի,  ունի 1.5 մլն դոլարի բյուջե։

«Այդ բյուջեն  ուտելու համար պետք է դաշտում ստեղծել բոբոներ ու հիմնավորել 1.5 մլն դոլարի ուտելը»,-նշեց Սաղաթելյանը։