Ձեր վստահելի աղբյուրը

«Սյունիքի մարզում բնակիչների իրավունքների երաշխավորման նպատակով պետք է ստեղծվի անվտանգության ապառազմականացված գոտի»,- ասուլիսում ասաց ՀՀ մարդու իրավունքների պաշտպան Արման Թաթոյանը՝  ներկայացնելով նոր հայեցակարգը մարզերում սահմանների հետ կապված գործընթացի վերաբերյալ։

Նա նշեց, որ ՄԻՊ իրավասության սահմաններում կատարված համակողմանի ուսումնասիրություններն ու ապացույցները վկայում են դրա անհրաժեշտության մասին:  

Ա. Թոթոյանն ընդգծեց, որ Ադրբեջանում բարձր մակարդակ ունի հայատյացությունը և թշնամանքի կազմակերպված քարոզի աստիճանն ունի ինստիտուցիոնալ նշանակություն:

Մարդու իրավունքների պաշտպանը նաև ասաց, որ Ադրբեջանը շարունակում է կրակոցները հայկական մի շարք գյուղերի ուղղությամբ, ուսումնասիրել են այն զինատեսակները, որոնցով առավելապես կրակում են ադրբեջանցիները:

Նա ներկայացրեց մի շարք ապացույցներ այս ամենի մասին:

Ա. Թաթոյանն ընդգծեց, որ սահմանների որոշման գործընթացի հիմքում պետք է լինեն կարևորագույն սկզբունքներ՝ իրավունքի գերակայություն, ժողովրդավարություն և մարդու իրավունքներ:

«Սահմանների հետ կապված բոլոր գործընթացների հիմքում պետք է լինեն մարդու իրավունքները: Սա ոչ թե այլընտրանքային պահանջ է, այլ պարտադիր պահանջն է: Ընդ որում, մարդու իրավունքն այնպիսի հիմք է, որ եթե այս հիմքը չպահպանվի, ամբողջ գործընթացի իրավաչափությունը տապալվում է միանգամից:

Միաջազգային սկզբունքներից պարտադիր  կիրառման ենթակա են՝ հարգանք սահմանային բնակիչների արժանապատվության նկատմամբ ու նրանց պաշտպանված իրավունքները, սահմանային բնակիչների բնականոն կյանքի ապահովում, անվտանգություն և խաղաղություն, հաշվետվողականություն, տեսանելիություն և բավարար տեղեկություններ: Իհարկե, այս ամենը պետք է ապահովվի հանձնաժողովային, մասնագիտացված աշխատանքներով, որոնք պետք է իրականացվեն նախապես մասնագետների ներգրավմամբ՝ ինժեներներ, հողաշինարարներ, պատմաբաններ, տեղի բնակիչների հետ պարտադիր համագործակցություն»,- ասաց Մարդու իրավունքների պաշտպանը:

Արման Թաթոյանն այնուհետև թվարկեց, թե այսօր ինչ խնդիրներ կան Գեղարքունիքի և Սյունիքի մարզերում. «Մարդկային արժանապատվության կոպիտ ոտնահարում: Խոսքս վերաբերում է խաղաղ բանկիչներին ու առաջին հերթին երեխաներին:

Կյանքի իրավունքի իրական վտանգներ: Ադրբեջանի կողմից արձակվող կրակոցներ խաղաղ բնակավայրերի անմիջական հարևանությամբ: Սյունիքի Ներքին Հանդ գյուղում դպրոցն ընդամենը 500 մետր հեռավորության վրա է ադրբեջանական զինված ուժերի դիրքերից ու այնտեղ արձակվում են կրակոցներ: Միջազգային որևէ կազմակերպության կարող է ինձ ասել՝ սա երեխաների լավագույն շահից բխող իրավիճա՞կ է»:

Նա նաև նշեց, որ արձանագրվում են սեփականության իրավունքի կոպիտ խախտումներ.

«Խոսքը վերաբերում է մի քանի իրավիճակներին, մարդիկ Խորհրդային Հայաստանի կամ ՀՀ պետական մարմինների կողմից ստացած օրինական փաստաթղթերը ձեռքներին՝ ֆիզիկապես չեն կարողնում օգտվել իրենց սեփականություն հանդիսացող տարածքներից, որովհետև դրանք, այսպես կոչված, ադրբեջանական են:

Հողեր, տներ կան, ուղիղ Ադրբեջանի նշանառության տակ են, կրակոցներ են, չեն կարողանում օգտվել դրանցից»:

Ա. Թաթոյանի ներկայացմամբ, հայեցակագի էությանն այն է, որ Սյունիքում պետք է ստեղծվի ապառազմականացված անվտանգության գոտի առնվազն 5-7 կիլոմետր տարածությամբ:

«Ապացույցների վրա հիմնված հաշվարկ է, հիմնված է նաև առավելապես այն զինատեսակներից կրակոցների հիման վրա, որոնք արձակում են ադրբեջանական զինված ուժերի ներկայացուցիչները հայկական գյուղերի ուղղությամբ»,- ասաց ՀՀ ՄԻՊ-ը:

Նա ընդգծեց՝ միջազգային հանրությունն այստեղ ունի կարևոր անելիք, քանի որ այս ամենը սկզբունքորեն  հակասում է այն ամենին, ինչ տարիներ ստեղծել են՝ մարդու իրավունքների ոլորտին վերաբերող ուղեցույցներ, կոնվենցիաներ, պահանջներ, հետևաբար, պետք է ստանա սկզբունքային լուծում:

Ա. Թաթոյանն ասաց, որ համագործակում են ՀՀ արտաքին գործերի նախարարության, դեսպանների հետ:

Մարդու իրավունքների պաշտպանը նշեց նաև, որ միջազգային լուրջ կառույցներից արձագանքներ ստացել են, սակայն անուն չի նշի, քանի որ պայմանավորվածություն ունեն:

«Ուրախ եմ, որ բարձրացվող հարցերը տեղ են հասում: Ամեն ինչ կոնկրետ ապացույցներով ենք ներկայացնում: Որևէ սուբյեկտիվ գնահատական առհասարակ չեմ տալիս, բացառապես ապացույցներ են, տեղեկություններ, փաստեր: Այս ամենի հիման վրա հանգում ենք եզրակացության, որ պետք է լինի ապառազմականացված անվտանգության գոտի, քանի որ գործ ունենք այն երկրի զինված ուժերի ծառայողների հետ, ում գերագույն գլխավոր հրամանատարի հայտարարած ռազմավարական քաղաքական նպատակներն ունեն էթնիկ զտումների ու ցեղասպան բնույթ»,- ասաց ՀՀ ՄԻՊ Արման Թաթոյանը: