Ձեր վստահելի աղբյուրը

«Սյունիքի դրապասները բաց են թշնամու առաջ, փոխարենը ժողովրդի առաջ զոդվում են ԱԺ դարպասները»,- այսօր ԱԺ ճեպազրույցների ժամին հայտնեց «Բարգավաճ Հայաստան» խմբակցության պատգամավոր Իվետա Տոնոյանն՝ իր խոսքը հիմնավորելով երկու օր առաջ ընդդիմության հանրահավաքի մասնակիցներին Աժ շենքից դիպուկահարների նշանառության տակ պայհելու փաստով:

Պատգամավորը նաև տարակուսանք հայտնեց իշխանության ներկայացուցիչների ոգևորության վերաբերյալ, որոնք հայտարարում էին, թե մարտի 1-ի հանրահավաքը մարդաշատ է եղել և տարածում էին լուսանկարները:

«Հանրապետութան հրապարակում հավաքված էր ժամանակին Նիկոլ Փաշինյանի վստահության քվե տված 880 հազար քաղաքացիների միայն 3 տոկոսը, անգամ 3 տոկոսը չէր կազմում»,- նկատեց Իվետա Տոնոյանը:

Նրա խոսքով, քաղաքականության մեջ զարգացումներն անասելի արագ են ընթանում և ցանկացած պահի կարող է ցանկացած գործընթաց տեղի ունենալ և լինել փոփոխություններ:

Իվետա Տոնոյանը հայտնեց, որ վարչապետի հրապարակած օրակարգի վերաբերյալ դեռ կուսակցության որոշումը չկա և եթե նպատակահարմար չգտնեին այն քննարկել, ապա կհայտարարեին, իսկ Վազգեն Մանուկյանի թեկնածության պաշտպանության հարցը չի քննարկվել կուսակցության քաղխորհրդի նիստում, հետևաբար՝ նա մնում է ԲՀԿ-ի թեկնածուն:

«Այս պահին Նիկոլ Փաշինյանի վերջին առաջարկի հետ կապված մենք քննարկում չենք ունեցել, որովհետև, այս դեպքում պետք է բացառապես քաղաքական խորհրդի ձևաչափում այդ որոշումը կայացվի՝ քաղաքական նոր իրողությունների քննարկումներից հետո»,- նշեց Տոնոյանը:

«Բարգավաճ Հայաստան» խմբակցության մյուս պատգամավոր Միքայել Մելքումյանն էլ հայտնեց, որ արտահերթ ընտրությունների հարցը որպես ստեղծված  ճգնաժամի հաղթահարման տարբերակ իրենց օրակարգում է, խնդիրը դրանց անցկացման ժամկետների մեջ է:

«Մենք օրական կորցնում ենք 5-7 մլն դոլար, պետական կառավարման համակարգը չի գործում և եթե այս վիճակը շարունակվի ամիսներ, ապա փաստի առաջ ենք կանգնելու և դրա տակից դժվար կլինի դուրս գալը»,- հայտարարեց Մելքումյանը:

Իվետա Տոնոյանը, լրացնելով գործընկերոջը,  նկատեց, որ ԲԴԽ նախագահ-«Իմ քայլը»  խմբակցության երեք օր տևած քննարկումը և արդյունքների բացակայությունը ԱԺ-ի աշխատանքային ռեսուրսների վատնում էր:

«Երեք օր շարունակ «Իմ քայլը»  խմբակցության մի խումբ պատգամավորներ լծված էին ԲԴԽ նախագահին անարգանքի սյունին գամելով, գործընթացին չառնչվող տարբեր հարցադրումներ ներկայացնելով, քանի որ այս դեպքում Վճռաբեկ դատարանների դատավորների ընտրության հարցն էր քննարկվում»,- ընդգծեց պատգամավորը և հավելեց, որ կառավարություն-ԱԺ հարցուպատսախանն էլ դեպի ոչնչի տանող ճանապարհ է, քանի որ վարչապետին ուղղված մի քանի տասնյակ հարցերից Նիկոլ Փաշինյանը մեկ հարցի հարկ համարեց անդրադառնալ, ինչը կոնկրետ ինստիտուտի կողմից անձնական քամահրական վերաբերմունք էր ԱԺ-ի նկատմամբ:

Պատգամավոր Արման Աբովյանն էլ հայտնեց, որ բանակը շարունակում է մնալ Հայաստանի ամենակարևոր ինստիտուտը և իշխանությունները պարտավոր են հաշվի նստել բանակի հետ:

«Այն իրավիճակը, որը ստեղծվել է իշխանությունների անհասկանալի, ապիկար գործողությունների հետևանքով, ամեն օր խորացնում և ծանրացնում է վիճակը»,- հայտարարեց Արման Աբովյանը:

Պատասխանելով Նիկոլ Փաշինյանի հետ ԲՀԿ առաջնորդի հանդիպման ժամկետի մասին հարցին՝ Իվետա Տոնոյանը նշեց. «Քանի որ այսօր ԲՀԿ-ի քաղաքական խորհրդի նիստ նշանակված չէ, իսկ այդ հանդիպումը պետք է տեղի ունենա քաղխորհրդի նիստից հետո, տրամաբանորեն՝ այսօր Գագիկ Ծառուկյան-Նիկոլ Փաշինյան հանդիպում նախատեսված չէ»: