Ձեր վստահելի աղբյուրը

«Ադրբեջանական մամուլը պատգամավորների մասնակցությամբ մեր հանդեպ լայնածավալ արշավ է սկսել բացարձակ վիրավորանքներով: Հատուկ հաղորդում ենք պատրաստել ու կներկայացնեք միջազգային կառույցներին, որ մարդու  իրավունքների պաշտպանի գործառույթները կատարելու համար սպառնալիքներն են հնչում»,- ասուլիսում ասաց ՀՀ Մարդու իրավունքների պաշտպան Արման Թաթոյանը:

Նա ընդգծեց՝ պատերազմի ընթացքում մարդու իրավունքների կազմակերպությունների պասիվությունը նպաստել է մարդու իրավունքների խախտումների ավելացմանը, քաղաքական հարցերը գերակայել են մարդու իրավունքների նկատմամբ:

«Սյունիքի և մյուս մարզերում վիճակը հենց այն իսկական օրինակն է, որ մարդու իրավունքներն ու ժողովրդավարությունը լրացնում են անվտանգությանը: Անվտանգությունը, մարդու իրավունքները, ժողովրդավարությունը ոչ թե իրար հակասող, այլ իրար լրացնող կատեգորիաներ են»,- ասաց Ա. Թաթոյանը:

Մարդու իրավունքների պաշտպանը նշեց, որ եթե անպատժելիությունը, հանցագործությունները չեն պատժվում, ավելի դաժան ձևով կարող են կրկնվել, հետևաբար, կարևոր է միջազգային հանրության խիստ արձագանքը:

«Ադրբեջանում գոյություն ունեն էթնիկ հիմքով և դրդապատճառներով պայմանավորված հանցագործություններ հայերի նկատմամբ և սպանություններ հենց առաջին հերթին: Դա հաստատել է Մարդու իրավունքների եվրոպական դատարանը իր մի շարք վճիռներով:  Հայատյացությունը գեներացվում է բարձրաստիճան քաղաքական ուժերի կողմից՝ նախագահի գլխավորությամբ»,- ասաց Թաթոյանը:

Այս ամենի պայմաններում, նրա խոսքով, որևէ մեկը պատկերացնո՞ւմ է Ադրբեջանի հետ խաղաղ գոյակցություն:

«Այս պայմաններում դուք պատկերացնո՞ւմ եք խաղաղ գոյակցություն, բա ընթացիկ հոգեկան տառապանքնե՞րը, որ Ադրբեջանը մտադրված պատճառում է, արհեստական ձևով ձգձգում է գերիների հարցը և սա նույնպես հոգեկան խոշտանգման ձև է: Միակողմանի խաղաղ գոյակցություն չի լինում»,- ասաց Արման Թաթոյանը:

Անդրադառնալով գերիների հարցին, Մարդու իրավունքների պաշտպանն ասաց, հայ գերիներն Ադրբեջանում պահվում են ապօրինաբար:

«Միջազգային իրավունքի և մարդասիրական իրավունքի կոպիտ խախտում է գերի պահելը՝ ամսաթվով պայմանավորված, որովհետև մենք գործ ունենք ընթացիկ զինված կոնֆլիկտի հետ, և այդ կոնֆլիկտը չի դադարել։ Եթե կա զինված ընթացիկ հակամարտություն, ապա, ակնհայտ է, որ մենք գործ ունենք գերիների հետ: Այն, ինչ անում է Ադրբեջանը, հակասում է եռակողմ հայտարարությանը»,- ասաց Արման Թաթոյանը: