Ձեր վստահելի աղբյուրը

ԲԴԽ նախագահ Ռուբեն Վարդազարյանի կինը երեկ չի հարցաքննվել։ Այս մասին «Փաստինֆո»-ի հետ զրույցում ասաց ԲԴԽ նախագահ Ռուբեն Վարդազարյանը՝ նշելով, որ սպասում են ծանուցագրին։

Խնդիրն այն է, որ ԲԴԽ նախագահի կինը հեռախոսով էր հրավիրվել, ինչին ի պատասխան ասել են, որ ծանուցագրի պայմաններում միայն կգնան հարցաքննության։

Աղբյուրը հիշեցնում է, ոոր երկու օր շարունակ ԱԺ-ում քննարկվում էր Վճռաբեկ դատարանի դատավորի ընտրության հարցը, որի ընթացքում ԱԺ «Իմ քայլը» խմբակցության պատգամավորներն իրենց հարցերը պետք է ուղղեին ԲԴԽ նախագահ Ռուբեն Վարդազարյանին՝ կապված Վճռաբեկ դատարանի դատավորի թեկնածուների հետ, սակայն հարցերը հիմնականում քաղաքական բնույթի էին և վերաբերում էին ԲԴԽ նախագահի ավելի վաղ արված հայտարարությանը։

ԱԺ պատգամավորների նման վարքագիծը մասնագիտական հանրության շրջանում դիտարկվեց որպես ուղիղ ճնշման փորձ՝ Վարդազարյանի նկատմամբ, իսկ այսօր արդեն հայտնի դարձավ, որ նրա կինը հրավիրվել է ՀՔԾ՝ հարցաքննության։

Վարդազարյանը «Փաստինֆո»-ի հետ զրույցում տեղեկացրել է, որ հարցաքննության կգնան ծանուցագրի պայմաններում։

Հարցին՝ արդյո՞ք բանավոր կարգով տեղեկացրել են, թե ինչ գործի շրջանակներում և ինչ կարգավիճակով են հրավիրել հարցաքննության, Վարդազարյանը պատասխանել է.

«Ոչ, նույնիսկ ինձ թույլ չեմ տվել հարցնել բանավոր կարգով, որովհետև օրենքը նման ընթացակարգ չի նախատեսում։ Ամենը լինելու է գրավոր և թափանցիկ, իհարկե այն մասով, որը նախաքննության գաղտնիք չի հանդիսանում։ Եթե ասում են հարցաքննության, ենթադրում եմ՝ վկա»։

Ինչ վերաբերում է իր նկատմամբ ճնշումներին և շրջանառվող լուրերին առ այն, որ ԲԴԽ նախագահի դեմ արշավը կազմակերպվել է Գագիկ Ջհանգիրյանի կողմից, Վարդազարյանը նշել է՝ չի կարծում, որ այդ արշավը կազմակերպված լիներ Գագիկ Ջհանգիրյանի կողմից։

«Սա նրա կալիբրը չէր, իսկ որ սա ճնշում է իմ նկատմամբ՝ կասկած չունեմ»,- նշեց Վարդազարյանը։

ՀՔԾ-ից Panorama.am-ի հետ զրույցում երեկ հաստատեցին՝ Վարդազարյանի կնոջը հրավիրել են ծառայություն։ Թե ի՞նչ գործով, ի՞նչ կարգավիճակում, ՀՔԾ-ից չպատասխանեցին։ 

Հոդվածն ամբողջությամբ սկզբնաղբյուր կայքում։