Ձեր վստահելի աղբյուրը

«Այսօր ձեռնոց է նետված Զինված ուժերին, որը հետպատերազմյան շրջանում կատարում է իր խնդիրները Նոյեմբերյանից մինչև Ագարակ»,- այսօր ՊՆ շենքի մոտ ԳՇ պետ Օնիկ Գասպարյանին և բանակին աջակցություն հայտնելու համար անցկացվող ակցիայի ընթացքում ասաց պահեստազորի գեներալ-մայոր Հենրիկ Մուրադյանը։

Նրա խոսքով, այն տղաները, որոնք հոգեբանական այս ծանր պայմաններում պետք է աջակցություն ստանային ՀՀ իշխանություններից, հայ ազգից, ժողովրդից, հակառակն են ստանում: Քայլ առ քայլ փորձում են քանդել մեր պետության միակ երաշխավոր ԶՈւ-ն։

«Մենք այստեղ ենք, որ հնարավորություն տանք ԶՈւ ստորաբաժանումներին իրենց խնդիրները կատարել ՀՀ սահմանամերձ գոտիներում և դիրքային ծառայությունում: Մենք այստեղ ենք, քանի որ այսօր գտնվում ենք բարդ ու ծանր իրավիճակում»,-նշեց նա:

Հենրիկ Մուրադյանը դիմեց բոլոր մարտական ընկերներին՝ խնդրելով մեկ մարդու նման միանալ այսօրվա սկսված շարժմանը, որը պետք է ապահովի ԶՈւ բնականոն գործունեությունը:

Ըստ գեներալ-մայորի, ՀՀ նախագահ Արմեն Սարգսյանին պետք է ԳՇ պետ Օնիկ Գասպարյանի ազատման առաջարկի սահմանադրականության հարցով պետք է դիմի ՍԴ-ին։

«Մենք մեր գործողություններով ապացուցելու ենք, որ այսուհետև ցանկացած պահի, ցանկացած իրավիճակում, եթե անհրաժեշտ լինի, նաև առաջնագծում, մասնակցություն կունենանք ԶՈւ այն գործընթացին, որը կապված է մեր պետության, ժողովրդի պահպանության հարցի հետ»,- շեշտեց նա: