Ձեր վստահելի աղբյուրը

«Մենք երկիրը երբեք չենք տանելու նոր ցնցումների։ Դա Նիկոլի ծրագիրն է։ Քանի դեռ հնարավորություն կա առանց ցնցումների հասնել այս դավաճանի հեռացմանը, գնալու ենք այդ ճանապարհով»,- ֆեյսբուքյան տեսաուղերձում ասում է Հայրենիքի փրկության շարժման համակարգող, ՀՅԴ ԳՄ ներկայացուցիչ Իշխան Սաղաթելյանը։

Նա նշում է, որ ի սկզբանե ասել են՝ հեշտ չի լինելու, բայց ոչ նահանջելու, ոչ հիասթափվելու առիթ չպետք է ունենան, քանի որ նժարի մի կողմում դրված է մեր պետության ու պետականության հարցը, մյուս կողմում դժվարությունները, որոնք գոյություն ունեն։

«Միասին հասնելու ենք այս դավաճանների հեռացմանը ու միասին կառուցելու ենք մեր երազանքի հայրենիքը»,-ընդգծում է Ի. Սաղաթելյանը։

Հայրենիքի փրկության շարժման համակարգողի խոսքով, ուժի մեջ է մնում իրենց պահանջը, հորդորը Հանրապետության նախագահին՝ Գլխավոր շտաբի պետ Օնիկ Գասպարյանին ազատելու վերաբերյալ Նիկոլ Փաշինյանի առաջարկությունն ուղարկել ՍԴ։ 

Ի. Սաղաթելյանն ասում է, որ այսօր ժամը 15։00-ին Բաղրամյան պողոտայում՝ ԱԺ դիմաց կայանալիք Հայրենիքի փրկության շարժման հանրահավաքի ժամանակ հարթակում մեծ տեղ են տալու երիտասարդությանը։ 

«Սիրելի երիտասարդներ, 2018 թվականին դուրս եկաք փողոց, կատարեցիք իշխանափոխություն՝ նպատակ ունենալով ունենալ ավելի լավ, հզոր, պաշտպանված Հայաստան, Հայաստան, որտեղ կապերիք արժանապատիվ, կստանայիք լավ կրթություն։ Դուք չէիք պայքարում, որպեսզի մի խումբ մարդկանց բերեիք իշխանության, որպեսզի նրանք  ստանային պարգևավճար, ձեր ընկերներին, հարազատներին  տանեին պատերազմի, կոտորածի, ձեր հայրենիքի մի մասը զիջեին թշնամուն։

Դուք խաբվել եք։ Խաբվել ենք մենք բոլորս։ Խաբվել են բոլոր նրանք, ովքեր հավատացել են սրանց։ Պետք չէ ապրել մեղքի զգացումով։ Նիկոլը խաբել է բոլորին։ Հիմա այդ սխալն ուղղելու ժամանակն է, ժամանակ է գալ այս հրապարակ, տեր կանգնել ձեր երկրին, պետականությանը, ստանձնեք պատասխանավություն, ուղղեք տեղի ունեցած սխալը ու, հեռացնելով այս իշխանությանը, կրկին գնալ ձեր երազանքի հետևից։

Դու եք որշելու Հայաստանի հաջորդ իշխանությունն ով է լինելու, այս պահին հարցը դա չէ, ինչ որ մեկին իշխանության բերելու խնդիր չէ։ Այս պահին այս չարիքից, դավաճանից, գործակալական ցանցից երկիրը մաքրելու ու ազատագրելու խնդիրն է, դրանից հետո միասին կձևավորենք նոր որակի ազգային իշխանության, ով բոլորիս երազանքներն իրականություն կդարձնի։

Հիասթափվել չկա, հետքայլ չկա, հուսահատվել չկա, քայլ առ քայլ գրանցել ենք բազմաթիվ հաջողություններ։ Իրականում մտնում ենք շատ վճռական օրեր, առաջիկայում լինելու է շատ վճռական շաբաթ երկրում ստեղծված հարցերը հանգուցալուծելու իմաստով»,- ասում է Իշխան Սաղաթելյանը։

Նա ընդգծում է՝ Բաղրամյան պողոտայից պետք է թելադրվի քաղաքական օրակարգը,  չեն զիջելու, գնալով ընդլայնվելու է այս հրապարակը։

Իշխան Սաղաթելյանը բոլորին հրավիրեց այսօր ժամը 15։00-ին Բաղրամյան պողոտայում՝ ԱԺ դիմաց կայանալիք Հայրենիքի փրկության շարժման հանրահավաքին։