Ձեր վստահելի աղբյուրը

Բաղրամյան պողոտայում Հայրենիքի փրկության շարժման հանրահավաքից հետո քաղաքական գործիչներն ու քաղաքացիները երթով անցան Երևանի փողոցներով։

Կառավարական ամառանոցների մոտով անցնելիս՝  ՀՅԴ-ական Գեղամ Մանուկյանը հայտարարեց. «Պատերազմում զավակներ կորցրած ծնողները հանդես են եկել նախաձեռնությամբ՝ կառավարկան ամառանոցների այս թաղամասը հանձնել զինվորականների վերականգնողական կենտրոնին:

Հաշված օրեր անց այստեղից, որտեղ երկիր ղեկավարողն իբր օղի թորող սարք էր դնում, դուրս են գալու այս տներից: Այս տները դառնալու են իրոք մեր երկրի արժանապատիվ քաղաքացիների, մեր երկիրը պահողների կեցավայր: Դրա համար պետք է մոտեցնենք օրը, որ մեր երկիրը դառնա՝  առանց Նիկոլ Հայաստան»:

Երթի մասնակիցներին անընդհատ միանում են նոր քաղաքացիներ՝ իրենց աջակցությունը հայտնելով Հայրենքի փրկության շարժմանը։ Շատ քաղաքացիներ էլ իրենց պատշգամբներից ծածանում էին Եռագույնը։

«Առանց Նիկոլ Հայաստան», «Ազգ, բանակ, հաղթանակ» ողջ ընթացքում վանկարկում են քաղաքացիները։ 

Հասնելով կրկին Բաղրամյան պողոտա՝ ՀՅԴ ԳՄ ներկայացուցիչ, Հայրենիքի փրկության շարժման համակարգող Իշխան Սաղաթելյանը հայտարարեց, որ Հայաստանում  քաղաքական օրակարգը թելադրվելու է  այս հրապարակից, այստեղի վճռականությունից է կախված Հայաստանի վաղվա օրն ու մեր ապագան։ 

«Այս հրապարակը պետք է պահենք ամուր, շարունակում ենք գիշերել այս հրապարակում։ Վաղն ու մյուս օրը տեղի են ունենալու մի շարք ծրագրեր, միջոցառումներ։ Նահանջելու, հիասթափվելու տեղ չունենք, նժարի մի կողմում հայրենիքի գոյության հարցն է, մյուս կողմում բոլոր դժվարությունները, որոնք պետք է միասին հաղթահարենք»,- ասաց Ի. Սաղաթելյանը։ 

«Ազգ, բանակ, հաղթանակ»՝ վանկարկում են քաղաքացիները։