Ձեր վստահելի աղբյուրը

«Այս օրերին Թուրքիան ավելի բացահայտ ու ինտենսիվ է թիրախավորում մեր ազգային արժեքները։ ԳՇ հայտարարությունը ամենաբուռն ձևով քննադատել է մեր թշնամի, ցեղասպան երկրի նախագահը, ԱԳ նախարարը, անգամ ամենածայրահեղական, հակահայ «Գորշ գայլեր» խմբավորման պարագլուխը քննադատում է մեր բանակին»,- այսօր ՊՆ շենքի մոտ ԳՇ պետ Օնիկ Գասպարյանին և բանակին աջակցություն հայտնելու համար անցկացվող ակցիայի ընթացքում ասաց թուրքագետ Ռուբեն Մելքոնյանը։

Նրա խոսքով, շարունակվում է թուրքական հարձակումը հայոց պետականության, ազգային արժեքների հանդեպ։

«Այն ձևակերպումները, որ կան Թուրքիայի այդ հայտարարության մեջ, որևէ կապ չունեն օբյեկտիվ իրականության հետ։ Թուրքիան մի քանի անգամ ռազմական հեղաշրջումների է բախվել, բնականաբար, ունի բարդույթներ այդ տերմինի հետ կապված։ Բայց մեզ ոչ թե իշխանության ձգտող սպաներ են, այլ՝ պետականության կորստի առաջ իրենց ձայնը բարձրացրած նվիրյալներ, որոնք բարձրաձայնում են պետականության կորստի վտանգի մասին։ Պետականության կորստի վտանգի մասին բարձրաձայնում են Մայր Աթոռն ու Հայոց բանակը։ Ուրիշ ի՞նչ ավելի կարևոր արժեքներ կան, որոնք կանգնած են մեր պետության ակունքներում»,- նկատեց նա։

Ռուբեն Մելքոնյանի գնահատմամբ՝ մոլորյալներ են այն մարդիկ, որոնք կարծում են, թե ԳՇ-ն քաղաքական կամ կուսակցական շահեր է հետապնդում։

«Թուրքիայից սպասելի են նոր մարտահրավերներ։ Ողբերգական է, որ մենք Հայաստանում լսում ենք նմանատիպ հայտարարություններ, որոնք հնչում են թշնամի երկրների ղեկավարների շուրթերից։ Հնարավոր չէր պատկերացնել, որ այդքան համանման, այդքան համահունչ կարող են լինել թշնամի պետության և ՀՀ քաղաքացիների որոշ շրջանակների հայտարարությունները։ Եվ ամենակարևորը, այսօր թուրքական լուտանքներին որևէ պետական կառույց չի պատասխանում։ Մեր բանակի, մեր ԳՇ-ի հասցեին հնչող վիրավորանքները, մեր իշխանությունների կողմից անարձագանք են մնում։ Եվ ստեղծվել է իրավիճակ, որ մեր հայրենիքը մի րոպե անպաշտպան չթողած սպայակազմն այսօր հայտնվել է պետության կողմից լքված վիճակում։ Ուստի բոլոր հայերի պարտքն է կանգնել բանակի կողքին»,- եզրափակեց խոսքը նա։