Ձեր վստահելի աղբյուրը

Արցախի «Միացյալ Հայաստան» կուսակցության ղեկավար, ազատամարտիկ Վահան Բադասյանը տեղեկացնում է, որ վերադառնում է Արցախ։ 

«Երկարատև դադարից հետո հնարավորություն ունեմ վերադառնալ հանրային հարթակ։

Խորին շնորհակալությունս եմ հայտնում բոլոր այն անձանց, ովքեր կալանավայրում գտնվելու ժամանակ իրենց մտահոգությունն ու աջակցությունն են հայտնել ինձ, այցելել, երաշխավորագեր, միջնորդագրեր են ներկայացրել իմ ազատության համար։

Մենք միասին ինքնիշխան և ազատ Հայրենիք կերտելու ճանապարհ ունենք անցնելու։
Ես վերադառնում եմ Արցախ, մասնակցությունս  ունենալու գերեվարված ծննդավայրս ու երկրամասս հետ բերելու, այն շենացնելու , ՀԱՅ պահելու նպատակով»,- ֆեյսբուքյան էջում գրել է նա։

Հիշեցնենք, որ ազատամարտիկ Վահան Բադասյանը կալանավորվել էր հունվարի 30-ին: Նա մեղադրվում է Քրեական օրենսգրքի 301-րդ հոդվածով նախատեսված արարք կատարելու մեջ, այսինքն՝ իշխանությունը զավթելուն, տարածքային ամբողջականությունը խախտելուն կամ սահմանադրական կարգը բռնի տապալելուն ուղղված հրապարակային կոչերը։  Հունվարի 28-ին Եռաբլուրում զինվորական պանթեոնում լրագրողների հետ զրույցում Վահան Բադասյանն ասել էր, որ Նիկոլ Փաշինյանը  պետք է վերանա ու հեռանա. «Եթե չի հեռանում, ուրեմն կվերացնենք ֆիզիկապես, զենքով։ Ես սկսելու եմ կազմակերպել»: Հենց այս հայտարարությունից հետո նա բերման է ենթարկվել ԱԱԾ:

Վահան Բադասյանը չի ընդունում իրեն առաջադված մեղադրանքը:

Փետրվարի 10-ին դատախազ Գևորգ Սարգսյանի կողմից կայացվել էր Վահան Բադասյանի նկատմամբ ընտրված խափանման միջոց կալանավորումը անազատության հետ չկապված այլ խափանման միջոցով՝ չհեռանալու մասին ստորագրությամբ փոխարինելու մասին որոշում։