Ձեր վստահելի աղբյուրը

«Նախորդ սերունդը պարգևեց մեզ անկախ պետություն, հզոր բանակ, հաղթանակներ։ Իսկ այն սերունդը, որը ծնվեց անկախության օրոք, կորցրեց այդ ամենը»,- այսօր «Հայրենիքի փրկության շարժման» հանրահավաքի ընթացքում ասաց շարժման վարչապետի միասնական թեկնածու Վազգեն Մանուկյանը։

Ըստ նրա, պարտության պատճառն այն է, որ ՀՀ-ում կար կոռուպցիա և կեղծվում էին ընտրությունները։ Միևնույն ժամանակ, սակայն, Վազգեն Մանուկյանը նկատեց՝ Ադրբեջանում ավելի շատ կար կոռուպցիա, և ավելի շատ էին խախտվում ընտրությունները։

«Իհարկե, և՛ կոռուպցիան, և՛ խախտված ընտրությունները թուլացնում էին մեր պետությունը, բայց պարտության բանալին այդտեղ չէ։ Այն ավելի խորն է՝ գաղափարական։ Ես պատասխանն ունեմ, հետո կասեմ։ Այդ հարցի պատասխանից է կախված՝ մենք ինչ երկիր ենք կառուցելու»,- ասաց նա։

Անդրադառնալով Նիկոլ Փաշինյանի հրաժարականի պահանջին՝ Վազգեն Մանուկյանը նշեց, որ նա մի զարմանալի հատկություն ունի՝ ինքը ցանկացած հարց ուզում է այնպես վերջանա, որ մաքսիմալ վնաս կրի մեր պետությունը։

«Պատերազմի չորրորդ օրն իրեն ասում էին՝ կանգնեցրու պատերազմը։ Ինքը կանգնեցրեց այն ժամանակ, երբ մենք արդեն ամենածանր վիճակում էինք։ Նույնն այժմ է։ Ինքը չի կարող կառավարել, դատապարտված է։ Չի կարող 1000 ոստիկանով շրջապատված կառավարել երկիր, որի ինստիտուտների մեծ մասն արդեն իրեն չի ենթարկվում։ Ինքը միևնույն է գնալու է, բայց դա անելու է՝ ամենամեծ վնասը բերելով պետությանը։ Խասյաթ է։ Եվ այդ պատճառով պետք է նրան արագ հեռացնենք»,- նշեց նա։

Վազգեն Մանուկյանի կարծիքով, Նիկոլ Փաշինյանն իշխանության մնալու մի տարբերակ ունի՝ բռնապետություն հաստատելը, բայց դա էլ այժմ չի կարող, քանի որ բանակն իր կողքին չէ։ Եվ նա հստակեցրեց, ոչ թե ԳՇ պետը, այլ ամբողջ բանակն է դեմ Նիկոլ Փաշինյանին։

«Բանակի հրամանատարները որոշել են, որ մինչև վերջ, անսասան կանգնելու են»,- ասաց նա, ապա հավելեց, որ իրադարձություններն այլ կերպ կզարգանային, եթե ՀՀ-ն նախագահ ունենար։

Իսկ այժմ, Վազգեն Մանուկյանի գնահատմամբ, ՀՀ-ն ունի մի «հարուստ տուրիստ», որն ապրում է հինգաստղանի դղյակում։

«Նա մեր գրպանի հաշվին պտտվում է աշխարհով մեկ՝ ոչ մի օգուտ չբերելով Հայաստանին։ Նույնիսկ, եթե այս րոպեին ինքը ստորագրի, խոսքս ուժի մեջ է. մենք նախագահ չունենք։ Բայց մենք ունենք ԱԺ, որը մեր օրենքներով գերագույն իշխանությունն է։ Իսկ այս 2.5 տարիներին ի՞նչ օրենք են ընդունել, որը ժողովրդի օգտին է։ Ոչ մի։ Մենք ունենք ձրիակերների միություն, իհարկե բոլոր պատգամավորների մասին չէ խոսքս, որը վնաս է բերում մեր երկրին ու պետությանը։ Ւրենք մի աշխատանք ունեն կատարելու՝ հավաքվել ու պահանջել Նիկոլ Փաշինյանի հրաժարականը։ Ուրեմն չպետք է կարողանան պատգամավորներն ԱԺ մտնել, գնացեք ու փակեք այդ մուտքերը։ Վրաններ կխփենք ու կփակենք ԱԺ բոլոր մուտքերը, տղե՛րք, առա՛ջ։ Դրա համար մեզ պետք է, որ ամեն գիշեր այստեղ 300 մարդ լինի, որ պաշտպանի մեր վրանները»,- ասաց Վազգեն Մանուկյանը։

Ներկայացնելով իրենց քայլերի հաջորդականությունը՝ Վազգեն Մանուկյանն ասաց, որ իրենք շրջապատում են ԱԺ-ը, և այն աշխատելու է միայն այն դեպքում, երբ պատգամավորները գան Նիկոլ Փաշինյանի հրաժարականը պահանջելու։