Ձեր վստահելի աղբյուրը

«Ես ուզում եմ ներողություն խնդրել, քանի որ 2018-ին եղել եմ Արմեն Սարգսյան կոչեցյալի նախագահության համար կողմ քվեարկողներից մեկը։ Մտածել եմ, որ մարդն ունի անցած ճանապարհ, իսկ ես՝ երիտասարդս իրավունք չունեմ քննադատելու նրա անցած ճանապարհը»,- այսօր «Հայրենիքի փրկության շարժման» հանրահավաքի ընթացքում ասաց ԱԺ նախկին փոխխոսնակ Արփինե Հովհաննիսյանը։

Միևնույն ժամանակ նա նշեց, որ 2018 թվականի իշխանափոխությունից հետո ինքը դարձել է Արմեն Սարսգսյանի ամենակոշտ քննադատներից մեկը։

«Հաճախ շատերն ինձ ասում էին, որ չարժե այդքան կոշտ լինել, հետո ասում էին՝ դե դուք եք բերել և այլն։ Ես մի համոզմունք ունեմ. առհասարակ չկա մարդ, որը չի սխալվում, բայց կան կարևոր իրավիճակներ, երբ դու պետք է հասկանաս, որ քո սխալը ծայրահեղ ծանր գին ունի։ Պատերազմից հետո պաշտոնյաների սխալների գինը չափազանց մեծացել է։ Վարչապետ կոչեցյալը՝ վախկոտը, կայացրեց ու չկայացրեց որոշումներ, ինչի արդյունքում ունեցանք 1000-ավոր զոհեր։ Նրա սխալը հայորդիների կյանք արժեցավ, ու մենք այսօր կանգնած ենք պետականության կորստի առաջ։ Իսկ Արմեն Սարգսյանը մոռացել է իր պարտականությունների մասին, նա նախագահ է աշխատում Փաշինյան Նիկոլի մոտ։ Ես ուզում եմ այսօր դուք իրեն ևս անվանեք դավաճան, քանի որ նա վաստակել է դավաճան լինելու պիտակը, քանի որ չկարողացավ կանգնել ու իր խոսքի տերը լինել»,- շեշտեց Արփինե Հովհաննիսյանը։

Նրա խոսքին հաջորդեցին «դավաճա՜ն» վանկարկումները։

Արփինե Հովհաննիսյանը նշեց, որ նա, ով ուզում է հաղթել, երբեք իրավունք չունի հուսահատվելու։ Նա նկատեց, որ իրենք սովորական մարդու հետ գործ չունեն, այլ իրենց անելիքը մարդու «վատագույն որակներ» ունեցողների հետ է։ Նա նկատեց, ԳՇ պետի հետ կապված պատմությունն ավարտված չէ, ուստի չի կարելի ընկրկել։

«Տեսել եք, որ Օնիկ Գասպարյանը դիմելու է Վարչական դատարան։ Հիմա վարչական դատարանը կարող է Նիկոլ Փաշինյանի և մնացած դավաճանների որոշումը սկզբունքորեն կասեցնել։ Մենք պետք է հիմա պահանջենք, որ Վարչական դատարանը կայացնի օրեքով համապատասխան որոշում»,- ասաց նա։

Քաղաքական գործչի խոսքին հաջորդեցին «Ազգ, բանակ, հաղթանակ» վանկարկումները։

Արփինե Հովհաննիսյանը հանրահավաքի մասնակիցներին կոչ արեց չհիասթափվել, քանի որ արդեն իսկ իշխանությունը պարալիզացված է։

«Մի բան ակնհայտ է՝ Փաշինյան Նիկոլ վարչապետ չի լինելու։ Մենք այսօր սպասում ենք Վարչական դատարանի որոշմանը, որից հետո պետք է շարունակենք պայքարը։ Մեզնից ամեն մեկը պետք է ունենա համոզմունք, մեր չհիասթափվելով է որոշվելու հաղթանակը։ Մենք պայքարելու ենք ու պայքարում ենք, որ ունենանք առանց Նիկոլ Հայաստան»,- եզրափակեց խոսքը Արփինե Հովհաննիսյանը։