Ձեր վստահելի աղբյուրը

«Ողջ գիշեր քաղաքացիների հոսքը Բաղրամյան պողոտա ու Դեմիրճյան փողոց չէր դադարում, բազմաթիվ քաղաքացիներ գալիս էին սատարելու, քնում էին այստեղ, նույնիսկ ընտանիքներով մարդիկ կային»,- Դեմիրճյան փողոցում լրագրողների հետ զրույցում ասաց ՀՅԴ ԳՄ անդամ Գեղամ Մանուկյանը:

Նա հիշեցրեց, որ այսօր ժամը 16:00-ին կայանալու է Հայրենիքի փրկության շարժման հանրահավաքը՝ ՀՀ-ում սահմանադրականության պաշտպանության, հայոց բանակի ու բանակի բարձրագույն հրամանատարական կազմի կողքին լինելու, աջակցելու համար, բնականաբար, Փաշինյանի հրաժարականի պահանջով կարգախոսներով:

Ինչ վերաբերում է կառավարության հայտարարությանը՝ ԳՇ պետին պաշտոնից ազատելու մասին, նա մեջբերումներ արեց իրավաբանների, սահմանադրագետների հիմնավորումներից, համաձայն որի, ԶՈւ Գլխավոր շտաբի պետի պաշտոնազրկումը չի կարող կարգավորվել այն օրենքով, որն ընդունվել է 2017-ին, 2018-ին էլ վերախմբագրվել է:

Բացի այդ, նրա խոսքով, վիճարկելի հարց է, նախագահը դիմել է ՍԴ մի օրենքի սահմանադրականությունը ճշտելու հարցում, որի վրա հղում անելով կառավարությունն ասում է, որ իրավունքի ուժով Օնիկ Գասպարյանը Գլխավոր շտաբի պետը չէ:

Գեղամ Մանուկյանն ընդգծեց՝ Գլխավոր շտաբի պետի պաշտոնավարումը կարգավորվում է  ՀՀ Սահմանադրությամբ:

«2020 թվականին նախագահ Արմեն Սարգսյանը դիմել է ՍԴ ճշտելու իր գործառույթները: ՍԴ որոշում կա՝ նախագահը նշանակում է, ազատում է, նշանակում է, ազատում է, Գլխավոր շտաբի պետի դեպքում ՍԴ-ն արձանագրել է՝ ՀՀ նախագահը նշանակում է Գլխավոր շտաբի պետ, ազատման մասին խոսք չկա»,- ասաց ՀՅԴ-ական գործիչը:

Նա նշեց, որ Փաշինյանն առաջին օրվանից գալով իշխանության՝ նպատակներից մեկը եղել է Զինված ուժերը գլխատելը:

Գ. Մանուկյանի խոսքով, Օնիկ Գասպարյանը բազմաթիվ քայլեր ունի անելու,կարող է դիմել նաև վարչական դատարան:

«Օնիկ Գասպարյանը հանգիստ կարող է պաշտոնավարել իբրև Գլխավոր շտաբի պետ, քանի որ հիմա գտնվում ենք շատ վտանգավոր իրավիճակում»,- ասաց նա:

Հարցին՝ տեղեկություններ կան, որ Փաշինյանը ԳՇ պետ կարող է նշանակել Արտակ Դավթյանին, Գեղամ Մանուկյանն ասաց. «Ես կարծում եմ, որ Նիկոլ Փաշինյանի մտքում Արգիշտի Քյարամյանն է կամ իր աներձագը, որովհետև իրենց ուղեղն այդ մակարդակից վերև չի բարձրանում:

Այն ավերը, որը բերեց Փաշինյանը... Մի օր «ոտքի դատարանն է գալիս»-ից հետո այդ ամենի մասին կխոսվի, որովետև այդ խելագարի պատճառով մենք մեր 30 տարին ենք կորցրել»: