Ձեր վստահելի աղբյուրը

Չնայած ընդդիմությանը հաջողվել է փակել ԱԺ բոլոր մուտքերը, սակայն «Իմ քայլը» խմբակցության պատգամավորները կարողանում են սողոսկել խորհրդարան և մասնակցել ԱԺ մշտական հանձնաժողովների նիստերին:

Այսօր խորհրդարանական մեծամասնության պատգամավոր Կարեն Գրիգորյանը Ֆինանսավարկային և բյուջետային հարցերի մշտական հանձնաժողովում ներկայացրեց Հաշվեքննիչ պալատի անդամի թափուր տեղի համար «Իմ քայլ» խմբակցության թեկնածու Գեղամ Հովեյանին:

Ընթերցելով թեկնածուի կենսագրությունը՝ Գրիգորյանը տեղեկացրեց, որ Հովեյանը 2008-2018 թթ. եղել է Վերահսկիչ պալատի 3-րդ բաժնի պետ, իսկ 2018 թվականից արդեն՝ Հաշվեքննիչ պալատի 3-րդ վարչությա պետ:

Իր խոսքում թեկնածուն հավելեց, որ պետական ֆինանսների վերահսկողության ոլորտում աշխատում է 20 տարի, իսկ իր ղեկավարած բաժինը զբաղվում է համայնքների և համայնքային հիմնարկների ֆինանսական գործունեության վերահսկողությամբ:

Հովեյանը նկատեց, որ եթե կառավարությունում և նախարարություններում ֆինանսների կառավարումն իրականացվում է ժամանակակից եղանակներով, ապա նույնը չի կարելի ասել համայքների հիմնական հատվածի մասին, որն ունի օբյեկտիվ և սոբյեկտիվ պատճառներ:

Նա գտնում է, որ համայնքների խոշորացումը և սուբվենցիոն ծրագրերի ավելացումը մարզերոմ  պահանջում են հաշվեքննության համակարգի կատարելագործում:

Գեղամ Հովեյանը, նկատելով, որ հիմնականում բյուջետային պլանավորան փուլում համայնքների թույլ տված սխալներն էլ բերում են խախտումների, առաջարկեց մինչև փաստացի հաշվեքննություն իրականացնելը նախնական հաշվեքննման համակարգ ներդնել, որը թույլ կտա կանխարգելել նման խախտումները:

Պատգամավոր Սերգեյ Բագրատյանը բարձրացրեց Հաշվեքննիչ պալատի աշխատակիցների օբյեկտիվ աշխատաոճի հարցը:

Վերջինիս արձաքանքեց «Իմ քայլը» խմբակցության պատգամավոր Կարեն Գրիգորյանը. «Հարկ եմ համարում նշել, որ ֆինանսապես կայուն մարդ է պարոն Հովեյանը և այդ իմաստով չեմ կարծում, որ որևէ գայթակղություն նրան կարողանա շեղել իր ազնիվ մղումներից»։

Հանձնաժողովը միաձայն հաստատեց թեկնածուին: