Ձեր վստահելի աղբյուրը

«Եղել է կազմակերպված պարտություն, պատասխանատուներն ու մեղավորները Հայաստանի ռազմաքաղաքական վերնախավն է»,-  ասուլիսում ասաց «Ազգային օրակարգ» կուսակցության խորհրդի նախագահ Արա Հակոբյանը:

Նա նշեց, որ ժամանակի ընթացքում, երբ որ կլինի իշխանափոխություն և ՀՀ-ում վարվող ազգային ազատագրական պայքարը կբերվի իր հանգրվանին, կլինի նախաքննություն, դատաքննություն, մեղավորները կունենան համապատասխան պատիժներ։

Ա. Հակոբյանի խոսքով, Զինված ուժերի Գլխավոր շտաբը հանդես եկավ հայտարարությամբ՝ պահանջելով Փաշինյանի և նրա իշխանախումբի հեռացումը։

«Այդ հայտարարությունն արել է Զինված ուժերը, բանակը, բայց երբ փորձում ենք վերագրել առանձին անձի՝ Գլխավոր շտաբի պետին, մենք հերթական սխալ ենք անում, մի անձի շուրջ փորձում ենք ձևավորել ակնկալիքներ, հերոսացնել։ Փաստորեն, մենք վտանգում ենք այն պայքարը, որը վարում ենք»,- ասաց քաղաքական գործիչը։

Արա Հակոբյանն ընդգծեց՝ բավական է փրկիչներ փնտրենք. «Բավական է։ Ամեն անգամ ունենում ենք հիասթափություն և հուսախաբություն։ Չեմ կարող  չասել, որ դա որոշակի տեխնոլոգիա է, որն օգտագործվում է, չեմ կարող չասել, որ, իմ կարծիքով,  դա արվում է  միտումնավոր, որպեսզի պայքարող հայության մոտ փորձեն ոգին, այդ ուժի ողնաշարը ջարդեն։

Քաղաքական ուժերի ղեկավարները, առաջնորդները չպետք է տրվեն այդ սադրանքներին, և չպետք է հերթական անգամ ընկնեն այդ ծուղակը»։

Անդրադառնալով Հանրապետության նախագահի՝ քաղաքական ուժերին իր մոտ հրավիրելուն, Ա. Հակոբյանն ասաց. «Իրավաբանորեն հաստատված մի շարք փաստեր կան, որոնք հանձնվել են դատախազությանը, ապացուցում են, որ իրականացվել է  պետական դավաճանություն եղած իշխանախմբի  կողմից։ Եղած իշխանախմբի մաս է կազմում նախագահ կոչվող Արմեն Սարգսյանը։
Այսինքն եթե նրանց հետ խոսելու բան կա, խոսելիքը կարող է լինել մի բան՝ իրենց հեռացման ճանապարհային քարտեզը։ Ուրիշ քննարկման առարկա ես, մեր կուսակցությունը չի տեսնում»։

Նա նշեց, որ Հայաստանը օրեցօր կորցնում է իր ինքնիշխանությունը, պետականությունը, պետական ինստիտուտները, հիմնաքանդված են պետական ինստիտուտները. «Հայաստան անունը կա, Հայաստան անունը մեր ներքին, արտաքին թշնամիները կարող են պահել  որոշակի այլ նպատակների համար, որպեսզի Հայաստանի անունից փաստաթղթեր ստորագրեն, տարբեր օրակարգեր սպասարկեն՝  ապահայկական, հակահայկական, հակապետական ու ապազգային»։

Ինչ վերաբերում է ՀՀ առաջին նախագահ Լևոն Տեր-Պետրոսյանի հայտարարություններին, Ա. Հակոբյանն ասաց. «Նրա հայտարարությունները ունեն սադրիչ և մանիպուլյատիվ դրսևորումներ։ Բնականաբար, նա, կարծում եմ, բավարարված է  այն ելքից, որ այսօր ունենք Հայաստանի հետ կապված, որն իրականացրեց  իր հոգեզավակ Փաշինյանը, իր իշխանախումբը, որի հիմքերը դրել է  ինքը։ Միաժամանակ փորձում է  իրեն հանել այդ հարվածի տակից՝ դե ես էլ եմ ասում, որ հրաժարական պետք է տա»։

Արա Հակոբյանի խոսքով, ստեղծված իրավիճակում միակ հանգուցալուծումն արտահերթ ընտրություններն են, սակայն վարողը չպետք է լինի Նիկոլ Փաշինյանը։

«Հանգուցալուծում է պետք, օրեցօր կորցնում ենք պետություն և պետականություն։ Հանցուլուծումը, եթե չենք ուզում գնալ արյունոտ բախումների, արտահերթ ընտրություններն են, առնվազն ընդդիմությունը դա հասկանում է»,- ասաց   «Ազգային օրակարգ» կուսակցության խորհրդի նախագահը։