Ձեր վստահելի աղբյուրը

ԱՄՆ իշխանությունները մտադիր են հակազդել կորոնավիրուսի դեմ պատվաստանյութերի վերաբերյալ ապատեղեկատվությանը, որը, ըստ Վաշինգտոնի, տարածում են մի շարք երկրներ, այդ թվում ՝ Ռուսաստանը: Այս մասին չորեքշաբթի օրը հայտարարել է ԱՄՆ պետքարտուղար Էնթոնի Բլինկենը, փոխանցում է «ՏԱՍՍ»-ը։

«Ես կիսում եմ ձեր մտահոգությունը պատվաստանյութերին առնչվող կեղծ և սխալ տեղեկատվության վերաբերյալ, որոնք տարածվում են, այդ թվում `Ռուսաստանի կողմից: Դա աներևակայելի վտանգավոր է, այն նաև աներևակայելի սխալ է և, ի վերջո, չափազանց հակարդյունավետ է ներգրավված երկրների համար։ Եթե նրանք քայլեր ձեռնարկեն պատվաստանյութերի վերաբերյալ կասկածներ սերմանելուն ուղղված, դա, ի վերջո, կվնասի նաև իրենց:

Մենք մտադիր ենք եռանդուն դիմակայել»,- ասել է ամերիկյան դիվանագիտության ղեկավարը՝ ելույթ ունենալով ԱՄՆ Ներկայացուցիչների պալատի արտաքին հարաբերությունների հանձնաժողովում կայացած լսումների ժամանակ:

Ավելի վաղ ՌԴ նախագահի մամուլի քարտուղար Դմիտրի Պեսկովը հայտարարել էր, որ Ռուսաստանը չի մասնակցում կորոնավիրուսի դեմ օտարերկրյա պատվաստանյութերի դեմ տեղեկատվական արշավներին: Ինչպես ընդգծել էր Պեսկովը, այս կապակցությամբ ցանկացած մեղադրանք բոլորովին անհեթեթ է: