Ձեր վստահելի աղբյուրը

«Երեկ Նիկոլը ցուցադրական գնաց Գլխավոր շտաբ, որտեղ ոչ մի էական  խնդիր չի քննարկվել, Հայաստանի անվտանգությանը վերաբերող հարցեր չեն քննարկվել,  զինվորականներին չի հարցրել, թե ինչու եք պահանջում իմ հրաժարականը, ինչ իրավիճակում է մեր երկիրը հիմա, ինչ վիճաում է մեր բանակը»,- ասուլիսում ասաց ՀՀ պաշտպանության նախկին փոխնախարար Արտակ Զաքարյանը:

Նա նշեց, որ  Նիկոլին  այդ ամենը  բոլորովին չի հետաքրքրում, գնաց, սահուն, խնդիրները սվաղող տեքստն ասաց ու վերադարձավ։

«Հասարակության մի հատված կա, ինչ տեսնում է, դրանից հետևություն է անում, այսինքն տեսան, որ զինվորականները Նիկոլի գլուխը չջարդեցին, ուրեմն լավ է։ Այդ հանդիպմանը ներկա ցանկացած զինվորականի հարցրեք այսօր, կասեն՝ այո մենք շարունակում ենք պահանջել կառավարության հրաժարականը»,- ասաց Ա. Զաքարյանը։

Նա ընդգծեց՝ Փաշինյանը չէր գնացել այնտեղ երկրի խնդիրները քննարկելու, եթե  հանկարծ սկսեր խոսել պրոբլեմներից, այն կվերածվեր Նիկոլի՝ հայկահայական, հակապետական լինելու մի ամբողջ բուկետի։

Արտակ Զաքարյանի չի կարծում, որ Զինված ուժերին ու Օնիկ Գասպարյանին որոշակի քայլերին գնալու հարցում ինչ որ բան կաշկանդել է։

«Բացառիկ դեպք է, երբ որ զինվորականները նման հայտարարություն են անում։ Վստահաբար կարող եմ ասել, որ սա ոչ միայն ԳՇ դիրքորոշումն է, մեր բանակի սպայական կազմի մոտ 70 տոկոսն այդպես է մտածում։ Մյուսները, եթե չեն բարձրաձայնում, ինչ -ինչ պատճառներով գուցե կաշկանդված են։ Բայց սա ամբողջ բանակի խնդիրն է։

Բանակն անմիջապես տեսում է ու զգում է խնդիրները։ Բանակն այսօր տեսնում ու զգում է,  որ հաջորդ պատերազմը  գրեթե անխուսափելի է դառնում, եթե այսպես շարունակվի։ Եթե Փաշինյանին հանդուրժեցինք վարչապետի պաշտոնում, 99 տոկոսով կարելի է վստահ լինել, որ հաջորդ պատերազմը սարերի հետևում չէ,  շատ շուտով լինելու է արդեն Հայաստանի տարածքների նկատմամբ»,- ասաց պաշտպանության նակին նախարարը։

Նա նշեց, որ եթե նորից պատերազմ լինի, չնայած համոզված է, որ այսպես շարունակվելու դեպում լինելու է,  այս քաղաքական իշխանության պարագայում համարեք, որ Սյունիքը կորած է ։

«Եթե Նիկոլը մնաց իշխանության, համարեք, որ Սյունիքը կորած է»,- ընդգծեց Ա. Զաքարյանը։

Նա նշեց, որ Նիկոլը դեռ ունի իր անելիք, բայց ՀՀ հետ  կապ չունի, հետևաբար  հայրենիքի փրկությունը հենց նրանում է, որ այս մարդն արագ լքի պաշտոն, որի միջոցով վնաս է հասցնում ՀՀ-ին։

«Զինված ուժերը դրա մասին են խոսում»,- ասաց նախկին նախարարը։

Ա. Զաքարյանի խոսքով, Փաշինյանը այդքան երիտասարդի տարավ ու մատաղ արեց իր՝ դիտավորյալ կամ տգետ քաղաքականության արդյունքում հրահրված պատերազմում, «այն պատերազմում, որը ոչ մի չափումներով հնարավոր չէր թուրքին բերել, հասցնել Շուշի, եթե ներսից չլինեին տրոյական ձիեր»։