Ձեր վստահելի աղբյուրը

«Նախագծով առաջարկվում է համաձայնություն տալ Երևանի Շինարարների փողոցի 23/9 հասցեի համայնքային սեփականություն հանդիսացող 0.02 հա մակերեսով հողամասը բազմաբնակարան բնակելի շենք կառուցելու նպատակով «ՋիԷմ Քոնսթրաքշն» ՍՊԸ-ին ուղղակի վաճառքի ձևով օտարելու  որոշմանը»,- գործադիրի հերթական նիստում հայտնեց  տարածքային կառավարման և ենթակառուցվածքների նախարար Սուրեն Պապիկյանը

Նախարարը տեղեկացրեց, որնախագծով նաև  հավանություն կտրվի ընկերության կողմից ներկայացված ներդրումային սոցիալական ծրագրին:

Նրա խոսքով՝ ծրագիրն իրականացվելու է երկու փուլով՝ կառուցելով երկու բազմաբնակարան շենք:

Ըստ Պապիկյանի՝ առաջին փուլում ընկերությունը պարտավորվում է սեփականության իրավունքով իրեն պատկանող Շինարարների փողոցի 23/1 հասցեում կառուցվող բազմաբնակարան շենքից տրամադրել մոտ 2000 ք/մ մակերեսով բնակելի տարածք՝ Շինարարների փողոցի 23 հասցեում բնակվող 3-րդ կարգի վթարային շենքի բնակիչներին վերաբնակեցնելու նպատակով:

«Այս փուլում նախատեսվում է կառուցել 11556 ք/մ ընդհանուր մակերեսով 18 վերգետնյա և 2 ստորգետնյա հարկ ունեցող բազմաբնակարան բնակելի շենք, որն ունենալու է 94 բնակարան և 22 ստորգետնյա ավտոկայանատեղի»,-հայտնեց նախարարը:

Ներկայացնելով նախագիծը՝ Պապիկյանը տեղեկացրեց, որ երկրորդ փուլում կապամոնտաժվի Շինարարների փողոցի 23 հասցեում գտնվող 3-րդ կարգի վթարային շենքը, և տեղում կկառուցվի 16408 քմ մակերեսով 18 վերգետնյա և 2 ստորգետնյա հարկ ունեցող բազմաբնակարան բնակելի շենք:

Տարածքային կառավարման և ենթակառուցվածքների նախարարը համոզված է, որ ծրագիրը կարևոր քայլ է Երևանի բնակֆոնդը թարմացնելու համար: